Volkswagen şirkəti Vyorter-Zeyə xüsusi GTI TCR hetçbekini gətirib

Bu günlərdə Avstriyadakı Vyorter-Ze gölünün sahilində 37-ci “GTI festivalı” keçirilir. Hər ilk keçirilən bu tədbir bir çox ölkədən olan Volkswagen Golf GTI pərəstişkarlarını bu gölün ətrafında toplayır.

Öz növbəsində, alman istehsalçısı daim öz pərəstişkarlarını sevindirmək üçün bu festivala müxtəlif konseptləri gətirərək geniş kütlə qarşısında nümayiş etdirir. Bu il də, ənənəyə uyğun olaraq alman istehsalçısı bir neçə avtomobili Vyorter-Zeyə gətirib. Bunlardan biri şirkətin özünün hazırladığı Golf GTI TCR konseptidir. Şirkət nümayəndələri bu konseptin seriya variantının ilin sonunda konveyerə və satışa çıxacağını bildiriblər.

Məlum olduğu kimi, TCR indeksi avtomobilə eyni adlı yarış seriyasının şərəfinə verilib. Lakin, konseptin bu çempionatda çıxış edən hetçbeklə ümumi cəhətləri demək olar ki yoxdur. TCR çempionatında iştirak edən Golf GTI ciddi şəkildə genişləndirilmiş təkər tağlarına, iri antiqanada və asketik salona malikdir. Yarış avtomobili 345 at qüvvəli turbomühərrik və sekvental transmissiya ilə təchiz edilir. 

Belə ki, konsept 290 at qüvvəsi və 370 Nm fırlanma anı hasil edən 2,0-litrlik TSI mühərriki ilə təchiz edilib. Mühərrikin daha yaxşı soyudulmasını təmin etmək üçün iki əlavə radiator quraşdırılıbdır. Güc aqreqatı yeddi pilləli DSG “robotu” ilə birlikdə çalışır. Ön öxda isə özüqapanan differensial quraşdırılıb. Avtomobilin maksimal sürəti 250 km/saat həddində elektronika tərəfindən məhdudlaşdırılıb.

Elektron “boyunduruq” çıxarıldıqda bu hədd 264 km/saata qədər yüksəlir. Əlavə öndənişlə Golf GTI TCR modeli üçün 19-düymlük təkər disklərini, adaptiv amortizatorları və Akrapovic buraxılış sistemini sifariş etmək mümkün olacaqdır. Bundan başqa, avtomobil 230 at qüvvəli GTI hetçbekindən başqa formalı bamperləri, kandar əlavələri və arxa diffuzoru, həmçinin oturacaqların orijinal örtüyü ilə seçiləcəkdir.

ДРУГИЕ СТАТЬИ