Porsche 911 kabrioletinin yeni nəslinin sınaqlarına başlanıb

Bu günlərdə Auto Express nəşri 992 seriyasından olan Porsche 911 Cabriolet modelinin cəsuslar tərəfindən çəkilmiş fotoşəkillərini yayıb.

Artıq məlumdur ki, Porsche şirkəti 2019-cu ildə yeni nəsil 911 sportkarını təqdim etməyi planlaşdırır. Bir müddət bundan öncə, alman istehsalçısı yeni sportkarın kupe kuzovlu variantının rəsmi fotoşəkillərini yaymışdır. Doğrudur, kupe kamuflyaja bürünmüş olsa da, yeni sportkarın dizayn üslubunda daha çox təkamül yolunun seçildiyini söyləmək olar.

Eyni sözləri avtomobilin açıq tipli kuzovu olan variantı barədə də söyləmək mümkündür. Bunun səbəbi də məlumdur. Vaxtı ilə 911 modelinin yaradıcısı olan Ferdinan Aleksander Porşe sportkarın dizaynının konservativ üslubda saxlanılmasının vacib olduğunu söyləyib. Odur ki, Porsche 911 modelinin dizaynına inqilabi dəyişikliklər gözləməyin.

Cəsus fotoşəkillərində təsvir edilən kabrioletə gəldikdə isə, sınaqdan keçirilən prototipin Turbo modifikasiyasının prototipi olduğunu söyləmək gərəkdir. Buna iri antiqanad və genişləndirilmiş hava girişləri işarə edir. Üstəlik, avtomobilin yumşaq tavanının da yeni materialla örtüldüyünü müşahidə etmək olar. Bu tavanın 20 saniyədən az müddətə açılıb-bağlanacağı ehtimal olunur.

Avtomobil hərəkət zamanı çəkildiyi üçün onun salonuna baxmaq mümkün olmayıb. Çox güman ki, kabrioletin salonu kupe modeli ilə bənzər olacaqdır. Mühərrik çeşidinə gəldikdə isə, yeni nəsil 911 sporkkarının hibrid güc aqreqatları ilə təklif ediləcəyi də söylənilir. Məsələn, Porsche Turbo S modeli Panamera Turbo S E-Hybrid liftbekinin hibrid aqreqatına sahib ola bilər.

ДРУГИЕ СТАТЬИ