Nissan şirkəti açıq kuzovlu Leaf elektrokarını hazırlayıb

Nissan şirkəti Tokyoda keçirilən və “yaşıl” texnologiyalara həsr edilmiş forumda Leaf elektromobilinin açıq kuzovlu variantını nümayiş etdirib. 2010-cu ildən başlayaraq bu günə qədər 100 min ədəd Leaf elektrokarı satılıbdır.

Nissan şirkəti də bu əlamətdar hadisəni qeyd etmək üçün Leaf Open Car adlı şou-karı hazırlayıb.

Şou-karı adi hetçbekdən fərqləndirən element onun tavanının və arxa qapısının olmamasıdır. Şou-kar da adi Leaf modeli kimi 150 at qüvvəsi və 320 Nm fırlanma anı təklif edən daha güclü elektromotorla təchiz olunub. Aqreqat 40 kilovat-saatlıq tutumu olan litium-ion batareyalardan qidalanır. 100 km/saat həddini elektromobil 7.9 saniyəyə toplayır. Onun maksimal sürəti 144 km/saat həddində məhdudlaşdırılıb.

Yeni Leaf modeli 378 kilometr yürüş etmək iqtidarındadır. 

Elektromobilin maraqlı xüsusiyyətlərindən biri də e-Pedal adlı sistemdir. Bu pedal sayəsində əyləc pedalına toxunmadan və basma gücünü tənzimləyərək avtomobili idarə etmək mümkündür. Əgər sürücü pedalı tam buraxarsa, sistem avtomatik olaraq rekuperasiya sistemini və mexaniki əyləcləri işə salır. Avtomobil, hətta, kəskin yoxuşlarda da əyləc pedalına basmadan tərpənmədən yerində durur.

Nissan şirkətindən əyləc pedalından yalnız qəfil təcili əyləcləmə zamanı istifadə olunacağı bildirilib. Nissan Leaf şossedə hərəkət üçün avtonom idarəetmə sistemi (avtomobili zolaqda saxlamaq, sürətlənmək və əyləcləmə funksiyaları olan) və avtomatik parktronik ilə təchiz edir. Sonuncu sükan sisteminə, akseleratora , əyləcə və arxa ötürməyə nəzarət edərək avtomobili dayanacaq yerinə istiqamətləndirir.

ДРУГИЕ СТАТЬИ