Volvo yeni S60 sedanını təqdim edib

Volvo şirkəti yeni nəsil S60 sedanını təqdim edib. Yeni modelin təqdimatı isveç markasının Çalztondakı (Cənubi Karolina, ABŞ) zavodunun açılışı zamanı keçirilibdir. Yeni Volvo S60 modeli isveç markasının dizel modifikasiyası olmadan satılacaq ilk avtomobilidir.

Volvo S60 modelinin qabarit uzunluğu 4761 millimetr, eni - 2040 millimetr, hündürlüyü isə 1431 millimetrdir. Onun təkər bazasının uzunluğu 2872 millimetrə bərabərdir. Sələfi ilə müqayisədə avtomobil 126 millimetr uzundur. Onun təkər bazası da 96 millimetr genişlənibdir. S60 sedanının baqaj bölümünün həcmi də artıb - 442 litr (+62 litr). Arxa oturacaq cərgəsinin qatlanması halında bu rəqəm 1680 litr edir.

Yeni nəsil Volvo S60 sedanı SPA (Scalabe Product Architecture) modul platformasında inşa edilib. Əvvəllər bu platformadan XC60 krossoverinin və V60 universalının inşasında da istifadə edilibdir. Volvo S60 standart olaraq 249 at qüvvəli 2,0-litrlik dörd silindrli turbomühərrik ilə təchiz ediləcəkdir. Belə avtomobil öndən çəkişli olacaqdır. Modelin 310 at qüvvəli aqreqatla təchiz edilən modifikasiyası isə tam çəkişli olacaqdır.

Bundan başqa, sedan iki tamçəkişli hibrid modifikasiyada da təklif ediləcəkdir - T6 və T8 Twin Engine AWD. Bu modifikasiyalar 340 və 400 at qüvvəli hibrid qurğu ilə təchiz olunacaqdırlar. Ən güclü variant 100 km/saat həddini 4,9 saniyəyə toplayacaqdır. T8 modeli üçün Polestar Engineered idman dəstini də sifariş etmək mümkündür.

Bu zaman, hibrid qurğunun gücü 415 at qüvvəsinə qədər yüksəldiləcəkdir. Modelin təchizatına tənzimlənən Öhlins amortizatorları, qızılı rəngli supportları olan Brembo əyləc mexanizmləri və ön dayaqları birləşdirən tir daxil olacaqdır. Volvo S60 Polestar Engineered 100 km/saat həddini 4,7 saniyəyə toplayacaqdır.

S60 sedanının təchizatına yarımavtonom idarəetmə sistemi, piyada və iri heyvanları aşkarlayan sistem, əks zolaqa çıxmanın qarşısını alan sistem və köndələn istiqamətdə hərəkət edən avtomobillər barədə xəbərdarlıq edən sistem daxil edilibdir. ABŞ-da avtomobili abunə yolu ilə almaq üçün Care by Volvo xidməti təsis ediləcəkdir. Bu xidmət avtomobildən istifadə üçün, sığorta və vergilər də daxil olan aylıq ödənişləri nəzərdə tutur. İstifadəçiyə yalnız benzinin dəyərini ödəmək qalır. ABŞ-la yanaşı bu xidmət Almaniya, İtaliya, Norveç, Polşa, İspaniya, İsveç və Böyük Britaniyada da işləyir.

Yeni Volvo S60 sedanın Azərbaycandakı satışlarına nə zaman başlanacağı barədə məlumat verilməyib.

ДРУГИЕ СТАТЬИ