Volkswagen I.D. R sportprototipi "Payks Pik" yarışının təsnifatında birinci olub

Volkswagen şirkətinin I.D. R Pikes Peak elektrik sportprototipi məşhur “Payks Pik” dağına dırmanma yarışının təsnifat mərhələsində ən yeyin zamana imza atıb. Sportprototip ikinci nəticəni göstərmiş Norma M20 SF PKP benzin mühərrikli prototipindən 11 saniyə yeyin olub.

Eyni zamanda, Volkswagen I.D. R sportprototipi burada beş il bundan öncə çıxış edən Sebastyen Lyöbdən də yeyin olub. Təsnifat üçün 20 kilometrlik trassanın qısaldılmış variantından – 8,3 kilometrlik trassadan istifadə edilir. Volkswagen prototipi bu məsafəni 3 dəqiqə 16,083 saniyəyə qət edib. Müqayisə üçün, Lyöb 2013-cü ildə təsnifatda 10 saniyə yavaş olsa da, yarış zamanı trassanın bu günə qədər keçilməyən mütləq rekorduna imza atıb.

O zaman, ralli üzrə doqquzqat dünya çempionu 875 at qüvvəli Peugeot 208 T16 prototipindən istifadə edərək, 8 dəqiqə 13,878 zamanını qeydə almışdır. Elektromobillər sinifində rekord isə, latviyalı mühəndislərin hazırladığı Drive eO PP100 prototipinə məxsusdur. Həmin prototip “Payks Pik” dağına 8 dəqiqə 57,118 saniyəyə dırmanıb. Alman istehsalçısı bu rekordu yeniləmək niyyətindədir.

ДРУГИЕ СТАТЬИ