Avropada 2019-cu ildə “İlin avtomobili” mükafatına iddialı olan namizədlərin siyahısı açıqlanıb. Bu siyahıya, 60 nəfərdən ibarət münsiflər heyətinin 38 avtomobil arasından seçdiyi yeddi model daxil olubdur. Müsabiqənin qalibi 4 mart 2019-cu ildə Cenevrə avtosalonunda elan ediləcəkdir.
Müsabiqədə iştirak edən avtomobillər növbəti tələblərə cavab verməlidirlər: bu yeni model olmalı və səsvermə anına ən azı beş Avropa ölkəsində satılmalıdır. Münsiflər heyəti finalçıları sadə səsvermə yolu ilə seçirlər. 2019-cu ildə Avropanın ən yaxşı avtomobili adı uğrunda Alpine A110, Citroen C5 Aircross, Ford Focus, Jaguar I-Pace, Kia Ceed, Mercedes-Benz A-Class və Peugeot 508 modelləri mübarizə aparacaqdırlar.
Keçən il bu ada Volvo XC40 modeli layiq görülüb. İsveç markası bu ada ilk dəfə sahib olub. “İlin avtomobili” adına 2017-ci ildə Peugeot 3008, 2016-cı ildə - Opel Astra, 2015-ci ildə isə Volkswagen Passat layiq görülüb.