Bir müddət bundan öncə, Cadillac şirkətinin iki “qaynar” modeli təqdim etməyə hazırlaşdığını bildirmişdik. Bu gün Detroytda keçirilmiş xüsusi tədbirdə amerikan istehsalçısı Cadillac CT4-V və CT5-V modellərini təqdim edib.
Gözlənilənlərin əksinə olaraq, amerikan şirkəti “qaynar” liftbeki 640 at qüvvəsi hasil edən 6,2-litrlik V8 Blackwing mühərriki ilə deyil, 3,0-litrlik Twin-Turbo V6 aqreqatı ilə təchiz edib. Altısilindrli mühərrik 360 at qüvvəsi və 542 Nm fırlanma anı hasil edir. Güc aqreqatı 10-pilləli avtomatik ötürmələr qutusu ilə çalışır. Cadillac CT5-V standart olaraq arxa ötürmə ilə təklif edilir. Lakin, “qaynar” liftbeki tam ötürməli sistemlə də sifariş etmək olar. İstehsalçı “qaynar” modelin dinamik göstəricilərini açıqlamayıb.
Cadillac CT5-V modelinin təchizatına V-seriyası modelləri üçün nəzərdə tutulmuş adaptiv Magnetic Ride Control 4.0 şassisi, 19-düymlük təkər diskləri, Performance Traction Managment (PTM) sistemi, V-rejiminə malik olan hərəkət rejimləri sistemi, Brembo əyləc mexanizmləri, tünd rəngli eksteryer elementləri daxildir. Opsionaı olaraq yarıavtonom rejimə malik olan Super Cruise sistemini də sifariş etmək olar.
“Qaynar” Cadillac CT5-V modelinin satışlarına gələn ilin əvvəlində başlanacaqdır.
