Müəllif Hyundai şirkəti yeni yığcam Kona krossoverinin üzərindən sirr pərdəsini götürmüşdür. Yeni krossover geniş mühərrik çeşidinə və avadanlıq siyahısına malikdir. Bundan əlavə, krossover opsional olaraq tam çəkiş sistemi və iki növ asqı sistemi ilə də təchiz edilir.
Cənubi Koreya istehsalçısının bildirdiyinə görə, krossover tamamilə yeni platformada istehsal edilmişdir. Koreyalılar bu platformanın xüsusi olaraq yığcam krossoverlər üçün hazırlandığını və “B-SUV seqmentində yeni standartları təyin etdiyini” iddia edirlər. Avtomobilin ölçüləri barədə məlumat verilməsə də, onun geniş salona malik olduğu bildirilmişdir. Yeni krossover kuzovu ikirəngli tərtibat sxemi ilə seçilir və plastidən hazırlanmış müdafiə qurşağı ilə təchiz edilmişdir. Hyundai Kona işıqdiodlarından hazırlanmış fənərlərlə də təchiz edilir.
Lakin, bu fənərlərin standart olaraq quraşdırılacağı yaxud opsiya kimi təklif ediləcəyi məsləsi sual altındadır.
Satılacağı ölkədən asılı olaraq krossover dörd müxtəlif mühərriklə təklif ediləcəkdir. Bunlardan birincisi 149 at qüvvəsi və 179 Nm fırlanma anı hasil edən 2,0-litrlik atmosfer mühərrikidir ki, bu mühərrik də altı pilləli avtomatik ötürmələr qutusu ilə birgə çalışacaqdır. Belə mühərriklə krossover 100 km/saat həddinə 10 saniyəyə sürətlənir və 194 km/saat maksimal sürətə malikdir.
Kona modelinin mühərrik çeşidinə 177 at qüvvəsi və 265 Nm fırlanma anı təklif edən 1,6-litrlik Gamma turbomühərriki də daxil edilmişdir. Güc aqreqatı yeddi pilləli iki muftalı “robotla” tandemdə çalışır.
Turbomühərrikli Kona 100 km/saat həddinə 7,7 saniyəyə sürətlənir və 210 km/saat maksimal sürətə malikdir. Avropa bazarında Kona 120 at qüvvəsi və 172 Nm fırlanma anı olan 1,0-litrlik üç silindrli turbomühərriklə təklif ediləcəkdir. Bu mühərrik krossoverə 100 km/saat həddini 12 saniyəyə toplamağa və 181 km/saata qədər sürətləndirməyə imkan yaradacaqdır.
Bundan əlavə, avtomobilin mühərrik çeşidinə xarakteristikaları açıqlanmamış 1,6-litrlik turbodizel də daxil ediləcəkdir.
Hyundai Kona modeli McPherson tipli ön asqı sistemi ilə təchiz ediləcəkdir. Çəkiş növündən aslı olaraq isə, avtomobil torsion dirəyi (öndənçəkişli) və ya çoxqollu asqı (tam çəkişli) ilə təklif ediləcəkdir. Krossoverin avadanlıq siyahısına geniş çeşiddə müasir təhlükəsizlik sistemləri daxil edilmişdir. Bunların arasında qəza təhlükəsi olarsa avtomatik qəfil əyləcləmə sistemi, hərəkət zolağında saxlama funksiyası, avtomatik “uzaq” işıqları da vardır.
Bundan başqa, krossover beş, yeddi və ya səkkiz düymlük displeyləri olan multimedia sistemini də əldə etmişdi. Bahalı variantlarda proyeksiya displeyinin və smartfonların induksion doldurulması sistemi də quraşdırılacaqdır. Hyundai Kona modelinin Cənubi Koreyadakı satışlarına bu aydan start veriləcəkdir. Auto Azərbaycan şirkətindən bildirildiyinə görə, Hyundai Kona modeli Azərbaycan bazarında təklif edilməyəcəkdir.
