Honda şirkətinə məxsus olan Acura markası Integra adını yenidən canlandırmaq niyyətindədir. Yapon istehsalçısı gələcək modelin ön fənəri təsvir olunan yeganə tizeri yayımlayaraq, Montereydə keçirilən avtomobil həftəsində bu barədə elan verib. Acura şirkətinin vitse -prezidenti və brend meneceri Con İkedanın sözlərinə görə, yeni Integra modeli orijinalının DNT-sini daşıyacaq yığcam premium avtomobili olacaqdır. Acura Integra modelinin debüt 2022-ci ilə planlaşdırılıb.
Yapon premium markası yeni model barədə heç bir məlumat verməyib, ancaq başqa bir yeni modelin - NSX Type S superkarının təqdimatı zamanı səmada dronlar vasitəsi ilə yaratdığı siluet sayəsində bəzi mülahizələr yürütmək olar. Yeni Integra modeli Subaru BRZ və Toyota GR 86 sportkarları ilə rəqabət aparacaq ikiqapılı idman avtomobili olaraq işıq üzü görəcəkdir.
Tizerə gəlincə isə, şəkildə gündüz hərəkət işıqlarının LED zolağını, radiator barmaqlığının bir hissəsini və fənərin altında yerləşən Integra yazısı təsvir olunub. İlkin məlumata görə, yeni model cari TLX Type S sedanının üslubunda dizayna malik olacaq, lakin özünəməxsus xüsusiyyətləri ilə seçiləcəkdir.
Acura Integra modelinin on birinci nəsil Honda Civic modelinin bazasında yaradılacağı, mexaniki transmissiya və mühərrikini Civic Si modelindən alacağı da istisna olunmur. Güc qurğusu ilə bağlı təfərrüatlar hələlik gizli saxlanılır, lakin böyük ehtimalla, bu aqreqat 208 at qüvvəli 1,5-litrlik turbomühərrikdən daha güclü olacaqdır.
Bütün hüquqlar Autograph.az saytına məxsusdur. Xəbərdən istifiadə zamanı sayta istinad etmək mütləqdir.
