İtaliyanın özəl Aehra şirkəti haqqında məlumat ilk dəfə ötən ilin yayında peyda olub. Keçən ilin noyabrda isə, şirkət özünün ilk perspektivli modelini - lakonik Aehra SUV adlı böyük elektrik krossoverini nümayiş etdirib. Başlanğıcda vəd edilmiş ikinci avtomobil isə yalnız indi təqdim edilib, özü də konsept-kar formatında.
Aehra Sedan elektromobili krossoverlə eyni platformada və eyni üsluba uyğun olaraq yaradılıb. Hər iki avtomobilin dizaynı üzərində Lamborghini brendinin keçmiş baş dizayneri Filippo Perini işləyib. İrəli irəli çəkilmiş salonu və karbon lifindən hazırlanmış kuzovun ümumi üslubu da qorunub saxlanılıb. Hətta iki avtomobilin uzunluğu (5,1 metr) və eni (2,0 metr) də eynidir, lakin sedan krossoverdən nəzərəçarpacaq dərəcədə aşağıdır: 1,64 metrə qarşı 1,43 metr.
Sedanın dörd qapısının hamısı böcəyin üst qanadları kimi yuxarı qalxır. Dörd ayrı oturacaq olan salon çox hündür sərnişinləri yerləşdirə və kinoteatra çevrilə bilər: nəqliyyat rejimində ön panelin daxilinə batırılmış geniş displey yuxarı qalxaraq nəhəng televizora çevrilə bilər. Yan və daxili güzgülər ekranlarla əvəz olunub, mərkəzi konsolun yerinə başqa bir displey quraşdırılıb. Bütün bunlar da krossoverdən köçürülüb.
Texniki məlumatlar hələlik təxminidir. Çəkisi iki tondan bir qədər az olan Aehra Sedan modeli ümumi gücü 750-820 at qüvvəsi olan üç elektrik mühərriki ilə hərəkətə gəlir. Tam doldurulmuş 120 kilovat/saatlıq dartma batareyası 800 kilometrlik yürüyüş üçün kifayət etməlidir. 925 volta qədər işləmə gərginliyi olan batareyaların tədarükü üçün Avstriyanın Miba Battery Systems şirkəti ilə müqavilə bağlanılıb. Sedanın maksimal sürəti 265 km/saat həddində məhdudlaşdırılıb.
Amerika Aehra sedanı üçün əsas bazara çevrilməlidir, buna görə də təxmini qiymət diapazonu dollarla göstərilir - 160 ilə 180 min dollar arasında. Sedan və krossover bazara eyni vaxtda daxil olmalıdır, lakin seriya avtomobillərinin tədarükünə yalnız 2026-cı ildə başlanılacaqdır (baxmayaraq ki, ilkin olaraq 2025-ci il elan edilmişdi). Ən maraqlısı odur ki, avtomobillərin istehsal ediləcəyi yer hələlik müəyyən edilməyib.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
