Siz Lamborghini Countach modelinə Aventador superkarının dəyərini ödəməyə hazırsınızmı? O zaman gələn ay Silverstounda keçiriləcək hərraclara qatılmanız məsləhətdir. Böyük Britaniyanın məşhur trekinin yerləşdiyi məkanda keçiriləcək hərracda iki ədəd klassik Lamborghini Countach modeli satışa çıxarılacaqdır. Hərracın təşkilatçıları bu avtomobilin satışlarında 300 min funt-sterlinq əldə etmək istəyirlər. Bu isə öz növbəsində 400 min dollar edir ki, bu da müasir Lamborghini Aventador superkarının dəyəridir.
Hərraca çıxarılacaq iki sportkardan birincisi kvadrat formalı hava girişləri, tilləri və digər elementləri ilə seçilən qırmızı rəngli Lamborghini Countach 25th Anniversary xüsusi nəşridir. Bu avtomobil vaxtı ilə Kərroll Şelbinin həyat yoldaşı Kleo Robertsə məxsus olmuşdur. Söylənilənlərə görə, yubiley nəşrinin tirajı 628 - 657 ədəd arasında olmuşdur. Hərraca çıxarılacaq sportkarın odometrindəki yürüş məsafəsinin göstəricisi 12875 kilometr təşkil edir.
İkinci Countach sportkarı isə, birinci avtomobilə nisbətən daha nadir tapılan avtomobildir. Bu model sportkarın daha erkən 5000 S variantıdır ki, bu modifikasiya da 320 ədədlik tirajla istehsal edilmişdir. Avtomobil vaxtı ilə Səudiyyə Ərəbistanının şahzadəsinə məxsus olmuşdur. Ağ rəngə boyanməş avtomobilin yürüş məsafəsi 48280 kilometr təşkil edir. Buna baxmayaraq, təşkilatçılar «kral Countach»nın satışından daha çox vəsait əldə etmək niyyətindədirlər.
Kral ailəsinə məxsus olmuş Lamborghini Countach
