Bir il əvvəl Audi və SAIC şirkətləri Çin üçün xüsusi olaraq yaradılmış AUDI subbrendini təqdim ediblər. Yeni brendin adında bütövlükdə böyük hərflərdən istifadə olunur, lakin yeni brend firma halqalarından məhrum edilib. Bu yaz Şanxay Avtomobil Sərgisində ilk seriya modeli olan AUDI E5 Sportback universalının premyerası keçirilib. İndi isə, Quançjou Avtomobil Sərgisində Çin brendinin ikinci modelinin carçısı olan AUDI E SUV konseptual krossoveri debüt edib.
AUDI E5 Sportback
Ənənəvi olaraq, AUDI prototipləri sadəcə konsept avtomobilləri deyil, istehsala yaxın olan nümayiş nüsxələridir. E SUV krossoveri, Audi şirkətinin Pekin dizayn studiyasında xüsusi olaraq Çin bazarı üçün yaradılmış E5 Sportback universalının tanış üslubunda görünüşə malikdir. Yaradıcılarının bildirdiyinə görə, krossover qısa çıxıntıları və relyefli yan tərəfləri olan sadələşdirilmiş kuzov dizaynı sayəsində yerində dayandıqda belə irəliyə istiqamətləndirilmiş kimi görünür. Ön və arxada brend loqotipləri də daxil olmaqla, genişləndirilmiş işıqlandırma quraşdırılıb. Yan güzgülər kameralarla əvəz olunub.
AUDI E SUV
AUDI E SUV prototipi tamölçülü krossoverdir: onun uzunluğu 5057, eni – 2042, hündürlüyü isə, 1786 millimetrdir. Təkər bazasının ölçüsü 3060 millimetr təşkil edir. Krossover SAIC ilə birgə hazırlanmış 800 voltluq ADP (Advanced Digitized Platform) modul platformasında inşa olunub. İkimühərrikli tam ötürmə sistem 680 at qüvvəsi istehsal edir və 0-dan 100 km/saata beş saniyəyə sürətlənməni təmin edir. 109 kilovat/saatlıq batareya cərəyan yükləmədən 700 kilometrdən çox gediş məsafəsini təmin edir. 320 kilometrlik gediş üçün on dəqiqə şarj etmək kifayətdir.
Krossover, lidardan istifadə edən AUDI 360 Driving Assist avtopilotu ilə təchiz olunub (onun “göbələyi” ön şüşənin üstündə aydın görünür). Sistem Çin yol şəraitinə uyğunlaşdırılıb və magistral yollarda, şəhərlərdə və dar dayanacaq yerlərindəki xarakterik yol şəraitini nəzərə alır. Artıq AUDI E SUV konseptinin seriya versiyasının 2026-cı ildə debüt edəcəyi və istehsalın qısa müddət sonra SAIC-Audi birgə müəssisəsində başlayacağı elan olunub.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
