Amerikada böyük Buick LaCrosse sedanının istehsalı 2019-cu ildə dayandırılıb: model General Motors konserninin restrukturizasiya proqramı çərçivəsində ixtisara düşüb. Lakin Çində onun istehsalı davam edir və xüsusi olaraq bu bazar üçün yeni, dördüncü nəsil LaCrosse sedanı hazırlanıb. O, hələ də Buick brendinin çeşidindəki ən böyük və ən prestijli sedandır. Onun inşa edildiyi təkər bazası 2905 millimetr olan önötürməli Epsilon platforması sələfindən miras qalıb. Amma modelin eksteryer və interyeri yenidən dizayn edilib.
Buick LaCrosse, Çindəki GM studiyası tərəfindən hazırlanıb və onun dizaynı artıq bir sıra yeni modellərdə istifadə olunan Pure adlanan yeni korporativ dizayn üslubunda həll edilib. Bu dizaynın xarakterik xüsusiyyətləri köpəkbalığı burnu üslubunda ön tərəf, mənfi bucaqlı mailliyi olan geniş radiator barmaqlığı, həmçinin böyük köpək dişləri şəklində olan baş optikasıdır. Nəsil dəyişikliyi ilə sedanın uzunluğu 32 millimetr (4996 millimetr) azaldılıb, eni dəyişməyib (1866 millimetr), hündürlüyü isə 10 millimetr (1469 millimetr) artırılıb. Təkər izi öndə 8, arxada isə 9 millimetr genişləndirilib.
Çeşidin zirvəsində, əvvəlki kimi, Avenir versiyası durur. O, radiator barmaqlığının üçölçülü naxışına, genişləndirilmiş xrom dekora, 19-düymlük təkər disklərinə (digər variantlarda diametri 17 və ya 18 düymdür), həmçinin hər birində 222 işıq diodu olan matrisa fənərlərinə malikdir. Arxa işıqların tək zolağı bütün təchizat səviyyələrində eynidir və o, 352 LED-dən ibarətdir. Açar-nişanı olan sahibi avtomobilə yaxınlaşdıqda, fənərlər kiçik bir işıq şousu göstərə bilərlər.
Yeni sedanın salonunun bütün istiqamətlərdə daha geniş olduğu bildirilir. Sələfinin mühafizəkar üslubundan iz belə qalmayıb: LaCrosse cihazlar paneli və media sisteminin məlumatlarını göstərən 30-düymlük, 6K icazəli əyri Eyemax ekranına malikdir. İdarəetməyə Snapdragon 8155 mikroçipi cavabdehdir, 5G bağlantısı və havadan yeniləmə funksiyası var.
Ön oturacaqların idarəetmə pultu Mercedes-Benz avtomobillərindəki kimi qapılarda yerləşir, transmissiyanın idarə olunması sağ sükanaltı dəstəyə həvalə edilib, mərkəzi konsolun yerində isə smartfonlar üçün iki simsiz enerji doldurma meydançası var. Avenir versiyasında bahalı dəri ilə ikirəngli daxili tərtibat və genişləndirilmiş kontur işıqlandırması (121 LED) və təkcə ön deyil, həm də arxa oturacaqlarda qızdırılma, havalandırma və vibromasaj funksiyaları var.
Yeni sedanın texniki hissəsi Çin üçün ənənəvidir. Təkmilləşdirilmiş dördsilindrli 1,5-litrlik (əvvəlki 169 at qüvvəsinin əvəzinə 180 at qüvvəsi) və 2,0-litrlik (237 at qüvvəsi) turbomühərriklər təklif olunur. Hər iki aqreqat doqquz pilləli “avtomat” ilə tandemdə çalışır. Bir vaxtlar LaCrosse Çində hətta 1,3-litrlik mühərriklərlə təchiz edilirdi, lakin bu seçimdən tez bir zamanda imtina olundu. 2016-cı ildən 2018-ci ilə qədər modifikasiya çeşidində bazarın qəbul etmədiyi hibrid versiya da var idi. GM bir müddət sonra yenidən hibrid sedanı çeşidə qaytaracağını bildirib. Bu dəfə hibrid sedan yeni güc qurğusunu alacaqdır.
Çində dördüncü nəsil Buick LaCrosse yayda satışa çıxarılacaqdır. Hazırda sedan 32-42 min dollar arasında dəyişən qiymətlərlə təklif olunur. Yeni model də bu qiymət diapazonunu qoruyub saxlamalıdır.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
