Pro indeksi dedikdə, ağıla gələn ilk şey ya Çin krossoveri və ya hansısa smartfon olur. Lakin bu dəfə belə bir indeks alman avtomobilinə verilib. Mercedes-Benz şirkətində bu indeksin əsl mənasını hələ də xatırlayırlar, odur ki, bu indeks ikinci nəsil Mercedes-AMG GT superkarının Qudvud Sürət Festivalında debüt etmiş drayver versiyasına verilib.
Yeni layihə 4,0-litrlik V8 biturbo mühərriki, doqquz pilləli AMG Speedshift MCT 9G avtomatik transmissiyası (hidrotransformator əvəzinə mufta ilə) olan tam ötürməli Mercedes-AMG GT 63 4Matic+ seriya modelinə əsaslanır.
![](https://autograph.az/../images/144786_src.jpg)
M177 mühərrikinin hasilatı 585 at qüvvəsi və 800 Nm-dən 612 at qüvvəsi və 850 Nm-ə qədər artırılıb, yəni, onun hasilatı GT 63 S E Performance hibridindəki ilə eynidir, baxmayaraq ki, Pro versiyasında elektrik mühərriki yoxdur. Lakin bunun dinamikaya demək olar ki, heç bir təsiri yoxdur: 100 km/saata sürətlənmə orijinal versiya ilə eyni 3,2 saniyə çəkir. Maksimal sürət isə, 315-dən 317 km/saata yüksəlib.
Lakin GT 63 Pro versiyasını fərqləndirən təkcə güc və fırlanma anı deyil. Yarış trekilərinin fatehi adına uyğun gəlmək üçün dözümlülük tələb olunur. AMG mühəndisləri biturbomühərrikin soyutma sistemini gücləndiriblər və indi o, hətta tam yüklənmə altında da qızdırmamalıdır. Təkər tağlarının qarşısında iki əlavə radiator quraşdırılıb, buna görə də bamperin yan tərəflərində inkişaf etdirilmiş hava girişləri görünür.
![](https://autograph.az/../images/144787_src.jpg)
Bundan əlavə, tam ötürməli 4Matic+ transmissiyasının istiliyə davamlılığı artırılıb. Paylayıcı qutu və hər iki oxlararası differensial elektrik nasosları olan maye ilə soyutma sisteminə malikdir. Artıq bazada altıporşenli supportları və 420 millimetrlik karbon-keramika diskləri olan ön əyləc mexanizmləri quraşdırılıb və onların soyudulmasını yaxşılaşdırmaq üçün altığındakı qalxanlar və örtmələr yenidən işlənib: onlar daxil olan havanın çoxunu əyləclərə yönəldirlər.
Pro versiyasının standart təchizatına həmçinin stasionar arxa antiqanad (digər modifikasiyalar üçün opsiyadır) və öndə 295/30 ZR21, arxada isə, 305/30 ZR21 ölçülü Michelin Pilot Sport 5 şinləri taxılmış yüngülləşdirilmiş döymə təkər diskləri var.
Aerodinamik dayağın yenidən işlənmiş konfiqurasiyası ön oxdakı qaldırma qüvvəsini azaldıb (minus 30 kiloqramın ekvivalenti), arxa oxda isə, yerəbasma qüvvəsini 15 kiloqram artırıb. Splitter, diffuzor və antiqanad karbonplastikdən hazırlanıb, əyləc mexanizmləri qara rəngə boyanıb. Salonda güclü yan dayağı olan AMG Performance oturacaqları, nappa dərisi və Microcut mikrofiberi ilə üzlənmiş sükan çarxı var.
Mercedes-AMG GT 63 Pro trek versiyasının çatdırılmalarına gələn ilin əvvəlində başlanmalıdır və onun qiyməti həmin zaman məlum olacaq. Onun Almaniyada Pro indeksi olmayan adi GT 63 üçün tələb olunan 189 min avrodan aşağı olmayacağı şübhəsizdir.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.