Bentley şirkəti Continental modelinin «bərkgedən» variantı olan GT Speed avtomobilinin təkmilləşdirilmiş variantını təqdim etmişdir. Black Edition modifikasiyasına yiyələnmiş təkmilləşdirilmiş kupe və kabriolet daha sürətli və daha güclü olmuşdur. Avtomobili hərəkətə gətirən 6,0-litrlik iki turboüfürməli W12 mühərrikinin gücü 635 at qüvvəsindən 642 at qüvvəsinə yüksəldilmişdir. Güc aqreqatının fırlanma anı 20 Nm artaraq 840 Nm bərabər olmuşdur. Mühərrik səkkiz diapazonlu avtomatik sürətlər qutusu ilə birgə çalışır.
Sırıfadan 100 kilometr/saat həddinə avtomobil 4,1 saniyəyə sürətlənir. Bu əvvəlkindən 0,1 saniyə daha yeyindir. Bentley Continental GT Speed modelinin maksimal sürəti 331 kilometr/saata bərabərdir.
Modelin Black Edition variantını fənərlərin və yan şüşələrin haşiyəsi də daxil olmaqla qara rəngə boyanmış kuzov elementlərinə, 21-düymlük təkər disklərinə, həmçinin qara və ya qırmızı rəngə boyanan əyləc supportlarına görə seçmək olar.
Bundan əlavə, gümüçü, qara, qırmız və ya sarı rəngə boyana bilən ön splitteri, arxa diffuzoru, kandarları və arxa görüntü qüzgülərin korpuslarını da qeyd etmək olar. Avtomobilin salonunun tərtibatında karbondan istifadə olunur və eksteryer elementlərinin rənginə uyğun tikişlər edilir.
Qeyd etdiyimiz kimi, avtomobil həm kupe, həm də kabriolet kuzovu ilə təklif edilir. Avtomobilin qiyməti istehsalçı tərəfindən açıqlanmamışdır.
İlk avtomobillər sahiblərinə yay aylarında çatdırılacaqdırlar.
