Bir il bundan əvvəl Bentley şirkəti W12 mühərriklərinin istehsalının tezliklə dayandıracağını bildirmişdi, iki ay əvvəl isə, onun hibrid əvəzləyicisini təqdim edib. İndi isə, həmin an gəlib çatıb: belə bir mühərrikin son nüsxəsi Kryudakı zavodda yığılıb. Bu hadisənin şərəfinə Bentley zavod muzeyində qala nahar təşkil edib və burada W12 mühərriklərinin yığılmasında iştirak edən hər bir şəxsə hədiyyə olaraq əfsanəvi mühərrikin bir porşeni verilib.
W12 mühərrikinin tarixi ilk nəsil Bentley Continental GT kupesinin debüt etdiyi 2003-cü ildə başlayıb. 20-illik istehsal müddəti ərzində 105 min ədəd belə mühərrik buraxılıb. Üstəlik, qohum Audi və Volkswagen avtomobillərində quraşdırılmış W12 mühərrikləri hesaba alınmır, çünki belə aqreqatlar adı çəkilən markaların avtomobillərində 2001-ci ildə quraşdırılmağa başlayıblar. Bentley öz mühərrikini dövrümüzün ən uğurlu 12-silindrli aqreqatı adlandırır.
Mühərrik bir neçə dünya rekordu ilə də öyünə bilər. Məsələn, 2007-ci ildə onunla təchiz edilmiş Bentley Continental GT kupesi buz üzərində dünya sürət rekorduna (322 km/saat) imza atıb, 2011-ci ildə isə, Continental GTC eyni şəraitdə 330 km/saata qədər sürətlənib. 2018-ci ildə W12 mühərrikli Bentley Bentayga Speed krossoveri məşhur Pikes Peak təpəyə dırmanma yarışında qalib olub, bir il sonra isə, bu uğuru Continental GT Speed kupesi təkrarlayıb.
Mövcud olduğu müddət ərzində W12 mühərrikinin məhsuldarlığı əhəmiyyətli dərəcədə artıb. Audi A8 və Volkswagen Phaeton sedanlarında ilk atmosfer mühərriki 420 at qüvvəsi və 550 Nm hasil edirdi, Bentley avtomobillərində quraşdırılan ilkin biturbo versiyası isə, 560 at qüvvəsi və 650 Nm-ə malik idi. Kiçik tirajla buraxılan Bentley Mulliner Batur modelində quraşdırılmış bu mühərrikin ən son əmtəə versiyası 750 at qüvvəsi və 1000 Nm təklif edir. Müqayisə üçün: W12 mühərrikini əvəzləyəcək yeni Ultra Performance Hybrid güc qurğusu 782 at qüvvəsi və 1000 Nm fırlanma anı hasil edir.
Kapotun altında 6,0-litrlik W12 mühərriki olan son avtomobillər xüsusi Speed Edition 12 versiyasında olan Bentley Bentayga, Continental GT, Continental GTC və Flying Spur modelləridir. Hər bir model 120 nüsxədə buraxılıb, baxmayaraq ki, xüsusi versiyaların əsas xüsusiyyəti xüsusi nişan və dekorasiyadan ibarətdir. Üstəlik, hər bir avtomobil W12 mühərrikinin silindr blokunun miqyaslı modeli ilə çatdırılır.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
