BMW şirkəti 1 Series (F70) hetçbekinin bir sıra təkmilləşdirmələri və dəyişiklikləri aldığını elan edib. Onların hamısı noyabr ayından etibarən əlçatan olacaqlar. Yeni başlanğıc versiyası - BMW 116 modeli 1,5-litrlik turbomühərrik (122 at qüvvəsi, 230 Nm) və yeddi pilləli Steptronic “robotu” ilə təchiz ediləcək və 100 km/saat həddinə 9,8 saniyəyə sürətlənəcək.
Tam ötürməli BMW 123 xDrive versiyası da çeşidə əlavə edilib. O, 48 voltluq üstqurumu olan 2,0-litrlik benzin turbomühərriki (218 at qüvvəsi və 360 Nm) və robotlaşdırılmış transmissiya ilə təchiz edilir. Belə hetçbek 100 km/saat həddini 6,3 saniyəyə toplayır.
Nəhayət, ən maraqlı yenilik “bərkgedən” BMW M135 xDrive modeli üçün nəzərdə tutulmuş M Technology dəstidir. Bu dəst hetçbekin idarəetmə xüsusiyyətlərini yaxşılaşdıracaq, lakin onu indi olduğundan daha sürətli etməyəcək.
Dəstə ön amortizatorların gücləndirilmiş ştokları, yüngülləşdirilmiş alüminium stabilizatorlar və gövdənin altındakı əlavə dayaqlar daxildir. Bonuslara M Compound əyləcləri, 19 düymlük M forged diskləri, inteqrasiya olunmuş başlıqları olan M Sport oturacaqlar və M High-gloss Shadowline xarici qara parlaq dekor daxildir.
M135 xDrive kapotunun altında heç bir dəyişiklik yoxdur. 2,0-litrlik B48 turbomühərriki 300 at qüvvəsi və 400 Nm fırlanma anı hasil edir və “robot” ilə tandemdə çalışır.
Sələfi F40ilə müqayisədə 100 km/saata sürətlənmə vaxtı 4,7 saniyədən 4,9 saniyəyə qədər artıb. Maksimal sürət dəyişməyib - 250 km/saat. Almaniyada belə bir hetçbek üçün 56 200 avro istəyirlər, BMW 116 isə, 32 900 avroya başa gələcək.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
