BMW ilk tam elektrik M3 modelinin prototipini Fransadakı sınaq trasında jurnalistlərə təqdim edib. "Motor1" nəşrinin əməkdaşı avtomobili idarə etdikdən sonra onun M3 adına layiq olduğunu bildirib.

Yeni model hər təkərə ayrıca güc ötürən dörd elektromotorla təchiz edilib. Güc qurğusunun ümumi hasilatı 838 at gücü və 1163 Nm təşkil edir. Təxminən 100 kVt·saatlıq batareyanın 483 kilometrə qədər yürüş ehtiyatı təmin edəcəyi gözlənilir.

BMW şarj göstəriciləri ilə də iddialıdır: maksimal güc 420 kVt-a çatır və cəmi 10 dəqiqəyə təxminən 349 kilometr yürüş ehtiyatı toplamaq mümkündür. Rekuperasiya sisteminin gücü isə 540 kVt-a qədər yüksəlir.

Elektrik M3-ün əsas xüsusiyyətlərindən biri M eDrive sistemidir. O, altı pilləli mexaniki sürətlər qutusunun işini təqlid edir və sürücüyə avtomatik və ya mexaniki rejim seçmək imkanı verir. M eSound sistemi isə əvvəlki M modellərini xatırladan süni mühərrik səsi yaradır.

Image alt Image alt Image alt Image alt Image alt Image alt

Dörd elektromotorun müstəqil idarə olunması avtomobilə döngələrdə hər təkərin dartma qüvvəsini ayrıca tənzimləməyə imkan verir. Sınaq zamanı jurnalist bu sistemin həm sürətli döngələrdə sabitliyi qoruduğunu, həm də arxa hissəni idarəolunan şəkildə sürüşdürməyə şərait yaratdığını qeyd edib.

BMW hələlik modelin seriya versiyasının bütün göstəricilərini açıqlamayıb. Bununla belə, ilkin sınaq elektrik M3-ün sadəcə sürətli elektromobil deyil, M ailəsinin idman xarakterini qorumağa iddialı model olacağını göstərir.

© 2000–2026 Autograph.az. Bütün hüquqlar qorunur. Materialların köçürülməsi və ya hər hansı formada istifadəsi yalnız Autograph.az-a aktiv keçid göstərilməklə mümkündür.