BMW şirkəti 7-12 sentyabr 2021-ci il tarixlərində keçiriləcək Münhen avtosalonunda X5 modelinin bazasında inşa edilmiş iX5 Hydrogen modelini nümayiş etdirəcəyini bildirib.
Üstəlik, statik təqdimatla yanaşı, həm də avtomobili sınamağı arzulayanlar üçün test sürüşü də nəzərdə tutulub. BMW şirkəti ilin sonuna qədər hidrogen avtomobillərinin istehsalına başlayacaqdır. Ancaq hidrogen krossoverləri nümayiş məqsədləri və texnologiyanın sınaqdan keçirilməsi üçün kiçik partiya ilə buraxılacaqdırlar.
BMW iX5 Hydrogen krossoveri X5 modelinə əsaslanır. Avtomobil 700 bar təzyiqində altı kiloqram hidrogen tutan iki kompozit balonla təchiz olunur: onlardan biri mərkəzi tuneldə, digəri isə arxa oturacaq cərgəsinin altındadır.
Kuzov üzərindəki mavi vurğular, 3D çap dekorları və Forest Stewardship Council tərəfindən təsdiqlənmiş Pirelli şinləri taxılmış aerodinamik cəhətdən optimallaşdırılmış 22-düymlük disklər hidrogen modelini adi X5 krossoverindən fərqlənməsinə kömək edir.
Krossoverin təchiz edildiyi i Hydrogen NEXT hidrogen qurğusu Toyota ilə birlikdə hazırlanıb. Qurğu beşinci nəsil eDrive elektrik mühərriki, yanacaq hüceyrəsi və gərginlik çeviricisindən ibarətdir.
BMW i Hydrogen NEXT modelinin maksimal gücü 374 at qüvvəsinə bərabərdir, lakin qısa müddət ərzində əlçatan olacaqdır: bufer batareyası boşaldıqda elektrik mühərrikinin hasilatı elektrokimyəvi generatorun gücünü, yəni 170 at at qüvvəsini keçməyəcəkdir. BMW şirkəti bufer batareyasının tutumunu hələlik açıqlamayıb.
Daha əvvəl bu istiqamətin inkişafının qarşısında duran əsas maneənin inkişaf etməmiş infrastruktur olduğu bildirilmişdi - hətta Avropada geniş yanacaqdoldurma məntəqələri şəbəkəsi yoxdur. Mütəxəssislər, hidrogen avtomobillərinin yalnız bu onilliyin ikinci yarısında kütləvi fenomenə çevriləcəyini proqnozlaşdırırlar.
Bütün hüquqlar Autograph.az saytına məxsusdur. Xəbərdən istifiadə zamanı sayta istinad etmək mütləqdir.
