Changan şirkəti Uni-T krossoverini yeniləyib. Bu krossover artıq üç ildir ki satışdadır və Çin bazarında Uni-T modelinə olan tələbat artıq azalmağa başlayıb. Əgər 2021-ci ildə Səma İmperiyasında 84 min belə avtomobil satılmışdısa, 2022-ci ildə bu göstərici 57 min olub. Buna görə də, Changan şirkəti gecikmədən krossoverin restaylinqini keçirmək qərarına gəlib.
Bununla belə, Changan Uni-T zahiri cəhətdən çox da dəyişməyib. Çərçivəsiz radiator barmaqlığının hücrələrinin formasına yenidən baxılıb, bamperlərin aşağı hissəsində yeni örtmələr peyda olub (bu səbəbdən avtomobilin uzunluğu 20 millimetr artaraq 4535 millimetrə çatıb), beşinci qapının üzərindəki spoylerin ölçüsü böyüdülüb. Buraxılış sisteminin çıxış borularının və yan güzgülərin korpuslarının forması da dəyişdirilib, lakin ümumilikdə bütün bunların avtomobilin görünüşünə demək olar ki, təsir etməyib.
Amma interyer tamamilə yenidir. Hətta qapıların üzlənməsi də dəyişdirilib, arxadan işıqlandırılan rəngli ornament peyda olub, üçqollu sükan çarxının əvəzinə ikiqollu variant quraşdırılıb. Cihazlar panelinin ekranının diaqonalı 10,3-dən 12,3 düymədək artırılıb, yeni media sistemi isə 12,8-düymlük displeyi alıb (əvvəllər təchizatdan asılı olaraq 10,3 və ya 12,3 düymlük displey quraşdırılırdı). Rəqəmsal kokpit üçün Qualcomm Snapdragon 8155 mikroçipindən istifadə olunur, havadan yeniləmə funksiyası da peyda olub.
Yenilənmiş Changan Uni-T krossoveri yalnız 188 at qüvvəsi və 300 Nm hasil edən 1,5-litrlik turbomühərrik, iki “yaş” muftalsı olan yeddi pilləli “robot” və ön ötürmə ilə təklif olunur. Səkkiz pilləli “avtomat” ilə tandemdə çalışan 2,0-litrlik aqreqat (233 at qüvvəsi, 390 Nm) mühərrik çeşidindən çıxarılıb və onun geri qayıdacağı məlum deyil. Yenilənmiş krossoverlər artıq Çindəki dilerlər mərkəzlərində peyda olublar. Yenilənmiş Changan Uni-T modelinin qiyməti 16900 - 20400 dollar arasındadır.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
