Citroën Paris avtosalonunda əfsanəvi 2CV modelinin yük furqonu versiyasına müasir baxış olan 2CV Fourgonnette Concept konseptini nümayiş etdirib. Layihə markanın kommersiya avtomobilləri irsinə ehtiram əlamətidir. Konseptin seriya istehsalı nəzərdə tutulmur.
1951-ci ildə təqdim edilən orijinal Citroën 2CV Fourgonnette kiçik sahibkarlar, sənətkarlar və fermerlər üçün nəzərdə tutulmuş praktik, ikioturacaqlı yük avtomobili idi. Geniş yük bölməsi, sadə quruluşu və əlçatanlığı ilə seçilən model sonradan Acadiane, C15 və Berlingo kimi kommersiya avtomobillərinə yol açan ənənənin bir hissəsinə çevrildi.
Yeni konsept bu irsi müasir dizayn dili ilə yenidən şərh edir. Avtomobilin ön hissəsi 2026-cı ildə nümayiş etdirilən 2CV Concept ilə eynidir. Arxa tərəfdə isə orijinal furqonun büzməli metal kuzovundan ilhamlanan, paralel relyef xətləri olan iri yük bölməsi diqqət çəkir. Tutqun gümüşü kuzov və boz disklər avtomobilə sadə, möhkəm və funksional görünüş verir.
Citroën-in baş direktoru Xavier Çardonun sözlərinə görə, orijinal Fourgonnette sadəcə iş avtomobili deyildi, insanların gündəlik həyatının bir hissəsi idi. Yeni konsept də həmin ruhu yaşatmağı, faydalı avtomobilin mütləq adi görünməli olmadığını göstərməyi hədəfləyir.
Bununla belə, Citroën 2CV Fourgonnette Concept gələcək seriya modelinin birbaşa carçısı deyil. Şirkət layihəni dizaynerlərin yaradıcı təşəbbüsü və kommersiya müştəriləri ilə əlaqəni vurğulayan konseptual iş kimi təqdim edir. Beləliklə, Berlingo ailəsinin yerini yaxın gələcəkdə daha kiçik furqonun tutacağına dair hələlik heç bir işarə yoxdur.
© 2000–2026 Autograph.az. Bütün hüquqlar qorunur. Materialların köçürülməsi və ya hər hansı formada istifadəsi yalnız Autograph.az-a aktiv keçid göstərilməklə mümkündür.
