Ferrari F80 superhibridi Formula 1 bolidləri və FIA WEC prototiplərinin kanonlarına uyğun olaraq inşa edilib və güc baxımından bütün məşhur sələflərini üstələyir. Ferrari şirkəti tarixdə ilk dəfədir ki, kupedə elektrik turbokompressorlarından istifadə edib və italyanlar unikal Boost Optimization funksiyası ilə bütün sənayeni təəccübləndirəcəklər. Yeni flaqmanın qiyməti 3,6 milyon avrodur.
SF90 Stradale də Ferrari LaFerrari superkarının varisi roluna iddialı ola bilərdi, lakin onun nisbətən münasib qiyməti və məhdudiyyətsiz tirajı buna imkan vermirdi. Yeni F80 bu “mənfi cəhətlərdən” məhrumdur: superhibrid 799 nüsxəlik tirajla buraxılacaq, onun qiyməti isə, 3,6 milyon avrodan başlayır. Onu artıq GTO və F40 modelləri ilə bir cərgəyə qoyurlar və italyan istehsalçısının tarixindəki texnoloji cəhətdən ən mükəmməl və ən güclü Ferrari avtomobili adlandırırlar.
F80 modelinin nə qədər unikal olduğunu onun Ferrari 499P yarış bolidi ilə güc qurğusunun ortaq arxitekturası, eləcə də bir yerlik bolidi idarə etməklə müqayisə oluna bilən təəssüratı yaradacaq 1+ oturacaq düsturu nümayiş etdirir.
Kupenin dizaynı Flavio Manzoninin rəhbərliyi altında Ferrari stil mərkəzinin komandası tərəfindən yaradılıb və dizaynerlər əsasən 12Cilindri modelindən ilham alıblar. Hiperkar 50-60-cı illərin modellərini təqlid etməyə çalışır və eyni zamanda gələcək avtomobillərin zahiri görünüşünü nümayiş etdirir - bu, iki ifrat məqamı birləşdirmək maksimum bacarıq tələb edir.
F80 modelinin “vannası” və damı karbonplastikdən və Nomex meta-aramid lifindən hazırlanıb. Titan boltlar ilə bərkidilmiş alt çərçivələr alüminiumdandır. Enerjiudan elementlər üçün italyanlar divar qalınlığı iki millimetrdən az olan detalları əldə etməyə imkan verən yeni tökmə üsulunu hazırlayıblar.
Ferrari F80 modelinin hibrid güc aqreqatı F163CF indeksli 3,0-litrlik V6 biturbo mühərrikinə əsaslanır. Aqreqat ilk dəfə Formula 1 avtomobillərində olduğu kimi, MGU-H sistemi olan elektrik turbokompressorları ilə təchiz edilib və 900 at qüvvəsi və 850 Nm fırlanma anı hasil edir.
Superhibrid bəzi komponentləri yarış avtomobillərindən götürüb, üstəlik, o, hər bir pillə üçün fırlanma anı əyrisinin dinamik kalibrləmələri ilə öyünən ilk Ferrari yol avtomobilidir. Avtomobilin ön təkərlərini 142 at qüvvəli iki elektrik mühərriki hərəkətə gətirir.
Daha bir elektrik mühərriki dirsəkli val ilə birləşdirilib və əyləcləmə zamanı generator kimi işləyə və ya sürətlənmə zamanı daxili yanma mühərrikinə kömək edə bilər. Sistemin ümumi gücü 1200 at qüvvəsidir.
Güc aqreqatının iş rejimi eManettino açarının köməkliyi ilə seçilir və F80 ideoloji cəhətdən SF90 Stradale və 296 GTB modellərindən fərqli olduğundan, o, elektrik dartmasından istifadə etmir.
Hybrid rejimində 2,28 kilovat/saatlıq batareyanın cərəyanını dəstəkləmək üçün enerjinin bərpasına üstünlük verilir, Performance rejimi isə, trek seansları zamanı sabit məhsuldarlığı təmin edir.
Ən “acıqlı” Qualify rejimində daha yüksək pilləyə keçərkən fırlanma anının miqdarının elektron tənzimlənməsindən istifadə edir ki, bu da daxili yanma mühərrikinin və elektrik mühərriklərinin dartma qüvvəsini ən yaxşı şəkildə birləşdirməyə imkan verir.
Lakin F80 superhibridinin ən maraqlı xüsusiyyəti Boost Optimization funksiyasıdır. Bu, onun avtomobil sənayesində ilk tətbiqidir və heç bir rəqibin, hətta McLaren şirkətində belə həll yoxdur.
Texnologiyanın mahiyyəti bundan ibarətdir: trekdə ilk gediş zamanı o, döngələri və düzlükləri müəyyən edir və sonradan ən yaxşı dövrə vaxtını qeydə almaq üçün lazımi yerlərdə “bustu” avtomatik işə salır.
“Bustun optimallaşdırması” yalnız Performance və Qualify rejimlərində işləyir. Dinamikaya gəlincə, F80 modeli 100 km/saata 2,15 saniyəyə, 200 km/saata isə, 5,76 saniyəyə sürətlənir. Maksimal sürət - 350 km/saatdır.
@ Bütün hüquqlar Autograph.az saytına məxsusdur. Məqalədən istifadə zamanı sayta istinad etmək mütləqdir.
