Cari nəsil Ford Explorer modeli ABŞ-da üç il bundan əvvəl debüt edib və onun plan üzrə reystalinqinə hələ çox var. Bununla belə, Ford Çində satılan modelin yenilənməsini həyata keçirib. 2020-ci ildə başlayaraq Səma İmperiyasında satılan Explorer krossoverləri Changan Ford birgə müəssisəsi tərəfindən istehsal olunur və yerli istehsal modeli amerikan qardaşından çox da fərqlənmir. İndi isə, Çində istehsal olunan Ford Explorer öz üzünə sahib olub.
Ofrouder daha enli radiator barmaqlığına, kənarlarında şaquli “dişləri” olan yeni ön bamperə və başqa fənərlərə sahib olub. Yenilənmiş krossoverin əvvəlkindən cəlbedici olduğunu söyləmək olmaz. Arxa tərəf də dəyişdirilib: burada yeni arxa fənərləri (beşinci qapıdakı əlavə bölmələr ilə), başqa bamper və buraxılış sisteminin fərqli çıxış boruları var. Opsiyalar arasında əvvəl olduğu kimi kuzovun ikirəngli boyanma sxemi mövcuddur.
Salonda da yeniliklər var: multimedia sisteminin şaquli planşeti 4K icazəsi olan üfüqi geniş ekranla əvəzlənib. Bunun üçün ön paneli tamamilə dəyişdirilib, lakin cihazlar paneli əvvəlki kimi günəşliyin altında yerləşir. Mərkəzi tunelə toxunulmayıb, əvvəlki konsoldan isə yalnız vacib düymələri olan kiçik pult qalıb.
Yenilənmiş Explorer modeli 276 at qüvvəli 2,3-litrlik turbomühərrik və 10-pilləli “avtomat” ilə təchiz edilir. İlkin məlumata görə, ofrouderin mühərrik çeşidinə 220 at qüvvəli 2,0-litrlik dördsilindrli turbomühərrik daxil ediləcəkdir. Bu mühərrik iki il əvvəl bəyan edilsə də, bu günə qədər seriya krossoverlərində quraşdırılmayıb. Yenilənmiş Ford Explorer krossoverinin kütləvi təqdimatı aprel ayında işinə başlayacaq Pekin avtosalonunda keçiriləcəkdir.
Bundan başqa, Çində yenilənmədən əvvəlki krossoverin əsasında yaradılmış xüsusi Ford Explorer Warrior versiyası təqdim edilib. Rəsmi məlumata görə, xüsusi versiya modelin 30 illik yubileyinə həsr edilib. Qeyd etmək lazımdır ki, Explorer modeli ABŞ-da 1990-cı ildə debüt edib, lakin çinlilər üçün bu fakt maraqlı deyil.
Warrior bolluca qırmızı dekora, damdakı polad baqaja və əlavə irəli çıxan ayaqaltılara sahib olub. Salonda da seçilən örtmələr vəd olunub, lakin texniki cəhətdən dəyişiklər yoxdur. Qiyməti 53 min dollar olan 600 ədəd belə krossover buraxılacaqdır.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
