Bakıda keçiriləcək Avropa Qran Prisinin başlanmasına bir aydan artıq vaxt qalır. F1 çempionatının dörd mərhələsi artıq geridə qalmışdır. İspaniya, Monako və Kanada kimi ölkələrdən sonra, Formula 1 çempionatının səkkizinci mərhələsini qəbul etmək növbəsi doğma Azərbaycanımızındır. Artıq çempionatda iştirak edən pilotlar trassamızla yaxından maraqlanmağa başlamışdırlar. Onllar ən yeni şəhər treki olan Bakı Şəhər Halqasında keçiriləcək 2016-cı il Formula 1 Avropa Qran Prisində iştirak etmək üçün bu yay ilk dəfə olaraq Bakıya səfər etməyi səbirsizliklə gözlədiklərini ifadə ediblər.
Azərbaycanda ilk dəfə baş tutacaq Formula 1 yarışında iştirak edəcək üçqat dünya çempionu Luis Hamilton, onun komanda yoldaşı və hazırda davam edən Formula 1 Dünya Çempionatının lideri Niko Rosberq (Mercedes AMG Petronas), Daniel Rikkardo (Red Bull Racing), Valteri Bottas (Williams Martini Racing), Niko Hulkenberq (Sahara Force India), o cümlədən, ikiqat dünya çempionu və Avropa Qran Prisinin rəsmi elçisi Fernando Alonso (McLaren Honda) Formula 1 təqvimindəki ən yeni şəhər treki barədə fikirlərini Bakı Şəhər Halqası Əməliyyat Şirkəti (BŞH) ilə bölüşərək, qarşıdan gələn və şəhər trekləri arasında ən sürətlisi olacağı gözlənilən yarışda güclərini sınamaqdan məmnun olduqlarını bildiriblər:
Luis Hamilton: “Mən Bakıya gəlməyi səbirsizliklə gözləyirəm. İştirak edəcəyim bu yarışa ev sahibliyi edəcəyiniz üçün təşəkkürümü bildirirəm. Bacardığım qədər çox insanla görüşməyə çalışacağam. Bu yarışı həvəslə gözləyirəm”.
Niko Rosberq: “Avropa Qran Prisinin keçirilməsi çox təqdirəlayiq haldır və ümid edirəm ki, çoxlu sayda avropalı azarkeş bu yarışı izləməyə gələcək. Əminəm ki, əhval-ruhiyyə çox yüksək olacaq”.
Daniel Rikkardo: “Bu yarış (Avropa Qran Prisi) yeni bir macəradır. Bu yarış mövsümə yeni əhval-ruhiyyə gətirəcək. Ən əsası, bu, şəhər treki olacaq. Mən şəhər treklərini xoşlayıram”.
Valtteri Bottas: “Mən Bakıda yarışmağı həvəslə gözləyirəm. Əslində, mən heç vaxt orada olmamışam. Odur ki, Bakı mənim üçün həm səyahət edəcəyim yeni bir məkan, həm də yarışacağım yeni trek olacaq. Mən həqiqətən də bu yarışı böyük səbirsizliklə gözləyirəm”.
Niko Hulkenberq: “Mən yarışların şəhər treklərində keçirilməsini alqışlayıram. İndi hamı Bakı Şəhər Halqasının qədim şəhərdən keçən hissəsi barədə danışır. İçəri Şəhərdən keçən o yol getdikcə daralır. Məncə bu, kifayət qədər maraqlıdır”.
Fernando Alonso: “Bu trek həddindən artıq sürət yığmağa imkan verən bir trekdir. Fikrimcə, Bakıdakı yarışda biz ən yüksək sürətə, 340 km/saata çata bilərik. Şəhər trekində belə sürət əldə etmək əvəzolunmaz bir hissdir”.
BŞH-nın icraçı direktoru Arif Rəhimov pilotların iyunda baş tutacaq Bakı Şəhər Halqası barədə fikirlərini belə şərh edib: “Ölkəmizdə ilk dəfə keçiriləcək Formula 1 yarışı haqqında dünyanın ən məşhur pilotlarının müsbət rəylərini və xoş arzularını eşitmək mənim üçün çox qürurvericidir.
Eyni zamanda bu, mənə və komandamızın digər üzvlərinə ölkəmizdə baş tutacaq möhtəşəm idman yarışının həcminin, miqyasının və əhəmiyyətinin nə dərəcədə böyük olduğunu bir daha xatırladır. Pilotlara gəldikdə isə biz onlara bir daha öz təşəkkürümüzü bildiririk, onları Bakıya gəlməyə və mövsümün ən yaxşı Formula 1 yarış həftəsonuna hazır olmağa səsləyirik”.
