Demək olar ki, bir həftə bundan əvvəl satılmış Genesis avtomobillərinin ümumi tirajı bir milyon həddini keçib. Gözlənildiyi kimi, premium markanın bestselleri Genesis G80 sedanı (391 min ədəd) olub, çünki o 2016-cı ildən istehsal olunur və yeni yaradılmış brendin ikinci modelidir. Ümumi satış həcmində ikinci yeri isə Genesis GV80 krossoveri tutur: 2020-ci ilin əvvəlindən bu günə qədər 174 min avtomobil satılıb. İndi isə GV80 planlaşdırılmış restaylinqdən keçib və onun Coupe versiyası da debüt edib.
Xarici dəyişikliklər cüzi xarakter daşıyır: radiator barmaqlığında ikiqat diaqonal çubuqlar var, bamperdəki hava girişlərinin konfiqurasiyası dəyişdirilib, xrom dekor genişləndirilib. İkimərtəbəli LED fənərlər eyni formaya malikdirlər, lakin artıq onlar MLA (Micro Lens Array) matrisa texnologiyasına sahibdirlər. Üstəlik, yeni örtməsi olan arxa bamper, fərqli dizayna malik olan təkər diskləri (20 və ya 22 düym) və yenidən işlənmiş rəng palitrası da peyda olub.
İnteryerdəki dəyişikliklər daha genişdir. GV80 yeni ön panelə sahib olub və onun üzərində həm cihazlar panelinə, həm də media sisteminə cavabdeh olan günəşliksiz 27-düymlük OLED displey var. Qeyd etmək lazımdır ki, bu paneldə zonalar arasında fiziki ayrım yoxdur. Sükan çarxı artıq üçqolludur. Mərkəzi konsol da yenidir, lakin klimat-kontrolun dəstək və düymələr olan idarəetmə paneli saxlanılıb. Mərkəzi tunel də dəyişdirilib: şaybalar indi fərqlidir, stəkanaltılar isə qapaqlarını itiriblər. Elektron köməkçilərin çeşidi genişləndirilib.
Texnologiya baxımından ən mühüm dəyişiklik 278 at qüvvəli 3,0-litrlik turbodizeldən imtinadır: bu aqreqat artıq Koreyadakı mühərrik çeşiddən çıxarılıb, baxmayaraq ki, onun ixrac bazarlarında saxlanılması mümkündür. Benzin turbomühərrikləri əvvəlkilərdir: 2,5-litrlik dördsilindrli (304 at qüvvəsi, 422 Nm) və 3,5-litrlik altısilindrli (380 at qüvvəsi, 530 Nm) mühərrik. Sabit supportları olan ön əyləclər GV80 modelində iki il əvvəl peyda olublar, ön kameranın məlumatlarına görə sərtliyi dəyişdirən adaptiv amortizatorları olan asqı isə əvvəlcədən quraşdırılır.
Əsas yenilik Genesis GV80 Coupe modelidir. Bu krossover hələ yazda konsept statusunda nümayiş etdirilsə də, yalnız indi seriyaya gedib. Bu, Genesis brendinin ilk kupeşəkilli krossoveridir və onun tərtibatçıları BMW X6 və Mercedes-Benz GLE Coupe modellərindən ilham alıblar: Koreya avtomobilinin kuzovunun forması “almanlarla” oxşardır. Ancaq bəzi orijinal həllər də mövcuddur. Məsələn, arxadakı “ördək quyruğunun” ilham mənbəyi keçən ilki Genesis X Speedium Coupe konseptidir.
Kupe versiyası standart GV80 krossoverindən 25 millimetr uzun (4965 millimetr) və 5 millimetr alçaqdır (1710 millimetr). Kross-kupe fərqli bamperlərə və radiator barmaqlığına malikdir, üstəlik, əsas barmaqlığın altında dörd əlavə kəsik var. Təkər diskləri də (20 və ya 22 düymlük) fərqli dizayna malikdirlər. İnteryerdə karbondan dekor və aşağı hissəsi “kəsilmiş” sükan çarxı var. İkinci cərgənin kürək hissəsi 40:20:40 nisbətində üç hissəyə bölünür. Əlbəttə ki, kupedə adi GV80 modeli üçün təklif olunan üçüncü oturacaq sırasından söhbət gedə bilməz.
Genesis GV80 Coupe eyni 2,5 və 3,5 litrlik benzin turbomühərrikləri ilə təklif olunur. Ötürmə arxaya və ya tam ola bilər. Bununla yanaşı, üçüncü, ən güclü modifikasiya da var – bu, 48 voltluq elektrik kompressoruna malik olan 3,5-litrlik V6 mühərriki ilə hərəkətə gələn krossoverdir. Xatırladaq ki, bu mühərrik Genesis G90 sedanında debüt edib. Top versiyanın mühərriki 415 at qüvvəsi və 549 Nm hasil edir. Belə krossover ön oxda qoşma muftası olan tam ötürməyə malikdir. Səkkiz pilləli avtomatik transmissiya yenidən sazlanıb və ən ekstremal idarəetmə rejimi olan Sports+ presetini, həmçinin launch control funksiyasını alıb. Təəssüf ki, “bərkgedən” krossoverin dinamik xarakteristikaları açıqlanmayıb.
Yenilənmiş Genesis GV80 ailəsi oktyabr ayında Koreya bazarında satışa çıxmalıdır. Yenilənmiş ailənin digər bazarlara ixracatına sonra başlanmalıdır.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
