İsveçrənin dəbdəbəli saat istehsalçısı olan International Watch Company Schaffhausen (IWC) manufakturası Mercedes-AMG bölməsi ilə əməkdaşlığı çərçivəsində maraqlı bir aksesuar hazırlayıb. Bu, qol saatıdır və Mercedes-AMG One hiperkarının sahibləri üçün nəzərdə tutulub. Saat, hiperkar sahibinin avtomobilinin yaxınlığında olmadığı zaman belə, onun statusunu vurğulamalıdır. Saatın dizaynı One hiperkarının üslubundadır və qol saatı ilə avtomobil arasındakı əlaqəni vurğulayır.
Saatın siferblatdakı “saat 9” nöqtəsində saniyə əqrəbi olan sabit qüvvəli açıq turbillon var, “saat 2” nöqtəsindəki ay fazasının göstəricisi, onu şimal və cənub yarımkürələri üçün göstərir, “saat 4” nöqtəsində isə avtomobilin taxometrinin siferbatına bənzəyən 96 saatlıq gediş ehtiyatı göstəricisi yerləşir. Siferblat kənarı One hiperkarının hava girişlərini xatırladan çoxlaylı qara halqalarla bəzədilib.
Diametri 46,2 millimetr və hündürlüyü 13,5 millimetr olan saat korpusunun çox hissəsi reaktiv mühərrik turbinlərində də istifadə olunan titan alüminidindən hazırlanır. Korpusun xarici hissəsi qumla emal edilib, siferblatın ətrafında cilalanmış üzük var - bu iki zona nazik Petronas Green zolağı ilə ayrılır.
Korpusun arxa hissəsi titan və keramikanın xüsusiyyətlərini birləşdirən IWC Ceratanium materialından hazırlanıb. Saat üzü qara, içərisi isə yaşıl rəngdə olan rezin qayışla gəlir. Onun üz tərəfi Petronas Green rəngində çoxsaylı Mercedes-Benz ulduzları ilə bəzədilib. IWC Big Pilot’s Watch Constant-Force Tourbillon Edition AMG One Owners saatının qiyməti açıqlanmayıb, lakin şirkət hər bir Mercedes-AMG One alıcısı ilə əlaqə saxlayıb, onların saat almaq istəyib-istəmədiyini öyrənəcəyini bildirib. Yəqin ki, qiymət hər bir müştəriyə şəxsən deyiləcəkdir.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
