Polestar 4 ailəsi yeni kuzov variantı ilə genişlənir. Kupe üslublu modelə qoşulan Polestar 4 SUV daha dik arxa hissəsi, arxa şüşəsi və artırılmış baqaj həcmi ilə daha praktik xarakter daşıyır. Ən maraqlısı isə budur ki, Polestar kupe versiyasının ən çox müzakirə olunan xüsusiyyətlərindən birindən — arxa şüşənin olmamasından — imtina edib. Yeni versiyanın satışına 2026-cı ilin sonlarında başlanması planlaşdırılır.
Kupe deyil, amma yenə də Polestar 4
SUV versiyasının dizaynı kupe modelinin əsas cizgilərini saxlayır. Ön hissə, T-formalı gündüz hərəkət işıqları və arxa tərəf boyunca uzanan işıq zolağı demək olar ki, dəyişməyib.
Əsas fərq arxa hissədədir. Yeni kuzov daha dik dam xəttinə malikdir və ənənəvi arxa şüşə ilə təchiz olunub. Beləliklə, kupe versiyasındakı rəqəmsal arxa görüntü sistemi ilə yanaşı, klassik salon güzgüsü də geri qayıdır.
Arxa sərnişinlərin baş üzərindəki məsafə də 25 millimetr artırılıb. Dam xəttinin daha praktik forması baqaj bölməsinin istifadəsini də asanlaşdırır.
Ölçüləri nə qədərdir?
Polestar 4 SUV kifayət qədər iri avtomobildir:
- Uzunluq: 4840 millimetr
- En: 2067 millimetr — güzgülər qatlanmış vəziyyətdə
- Hündürlük: 1556 millimetr
- Təkər bazası: 2999 millimetr
- Klirens: ön tərəfdə 166 millimetr, arxada 186 millimetr
Beləliklə, demək olar ki, 4,84 metrlik kuzov və 3 metrlik təkər bazası Polestar 4 SUV-yə həm geniş salon, həm də uzun kuzov nisbətləri verir.
Baqaj bölməsində də praktikliyə üstünlük verilib. Arxa oturacaqların arxasında təxminən 650 litr, oturacaqlar qatlandıqda isə 1665 litr həcm əldə edilir. Ön hissədə əlavə kiçik baqaj bölməsi də mövcuddur.
İki güc versiyası
Polestar 4 SUV texniki baxımdan kupe versiyasının güc qurğularını qoruyur. Giriş səviyyəsində arxa ötürməli Single Motor versiyası yerləşir. Yeganə elektromotor 272 at gücü hasil edir.
Daha dinamik seçim isə Dual Motor versiyasıdır. Ön və arxa oxlarda yerləşdirilən iki elektromotorun ümumi hasilatı 544 at gücü təşkil edir və avtomobil tam ötürmə sisteminə malikdir. Bu versiyanın sürətlənmə göstəricisi də kifayət qədər ciddi olacaq: 0–100 km/saat həddinə 3,8 saniyə.
100 kilovat/saatlıq batareya
Hər iki versiyada 100 kilovat/saatlıq litium-ion batareyadan istifadə olunur. Batareya 400 voltluq elektrik arxitekturasına malikdir və 110 elementdən ibarətdir. WLTP metodologiyasına əsasən yürüş ehtiyatı versiyadan asılı olaraq 600 kilometrdən çox ola bilər. Single Motor versiyasında bu göstərici təxminən 630 kilometr, Dual Motor versiyasında isə təxminən 600 kilometr səviyyəsindədir.
DC sürətli şarj sistemi 200 kilovata qədər gücü dəstəkləyir. Batareyanı 10-dan 80 faizə doldurmaq təxminən 30 dəqiqə tələb edir.
Praktiklik texnologiya ilə birlikdə
Yeni SUV versiyasında maraqlı yeniliklərdən biri Camping Mode funksiyasıdır. Avtomobil dayandıqda iqlim sistemi və multimedia funksiyalarından istifadə etməyə, həmçinin avtomobilin batareyasından xarici cihazları enerji ilə təmin etməyə imkan verir.
Dam reylinqləri də SUV versiyasının praktiki xarakterini gücləndirir. Daha böyük panoram dam və elektroxrom şüşə seçimi də avadanlıqlar siyahısına əlavə olunub. Ən güclü versiyada isə aktiv ZF amortizatorları, Brembo əyləcləri və 22 düymlük Pirelli şinləri təklif olunur.
Ən mübahisəli detal feri qayıtdı
Polestar 4-ün kupe versiyasının arxa şüşəsiz dizaynı brendin ən cəsarətli qərarlarından biri idi. Kamera vasitəsilə formalaşdırılan rəqəmsal arxa görüntü sistemi futuristik görünsə də, hamı tərəfindən birmənalı qarşılanmamışdı.
SUV versiyası isə daha ənənəvi yanaşma seçir: arxa şüşə, klassik salon güzgüsü və daha praktik kuzov. Nəticədə Polestar 4 artıq yalnız dizayn nümayişi deyil. O, daha geniş salonu, böyük baqajı, uzun yürüş ehtiyatı və iki fərqli güc qurğusu ilə gündəlik istifadəyə daha uyğun elektrik SUV-yə çevrilir.
AUTOGRAPH NOTE
Cəsarətli dizayn diqqət çəkir. Praktiklik isə uzun müddət yaşadır.
Polestar 4 kupe-krossover kimi özünü fərqləndirməyi bacardı. Yeni SUV versiyası isə həmin cəsarətli yanaşmanı gündəlik həyatın tələbləri ilə uzlaşdırmağa çalışır. Daha ənənəvi kuzov, arxa şüşə və daha böyük baqaj bunun göstəricisidir.
Bəzən yaxşı ideyanı dəyişmək yox, onu daha çox insan üçün yaşana bilən etmək lazımdır.
