Citroën Paris avtosalonunda əfsanəvi 2CV modelinin müasir davamçısı ola biləcək yeni konsepti göstərib. Retro dizaynı, yığcam ölçüləri və elektrik mühərriki ilə seçilən 2CV Concept gələcək seriya modelinə ilkin baxışı nümayiş etdirir. Şirkət yeni avtomobili 2028-ci ilədək model sırasına əlavə etməyi planlaşdırır.
1948–1990-cı illərdə istehsal olunan orijinal 2CV Fransanın ən tanınmış avtomobillərindən birinə çevrilmişdi. Yeni konsept onun dairəvi formalarını və xarakterik siluetini qoruyur, lakin klassik görünüşü müasir xətlərlə birləşdirir.
Uzunluğu cəmi 3,76 metr olan avtomobil hətta orijinal 2CV-dən də qısadır. Citroën-in hədəfi təxminən bir ton çəkisi olan, şəhərdə rahat idarə edilən və park etmək asan olan elektromobil yaratmaqdır.
Konseptin dizaynında sadəlik və praktikliyə xüsusi diqqət yetirilib. Dairəvi ön fənərlər, fərqli formalı kapot, qabarıq təkər tağları və klassik 2CV-ni xatırladan qapı tutacaqları keçmişlə əlaqəni qoruyur.
Eyni zamanda, kuzovun iri səthləri və ayrı-ayrılıqda dəyişdirilə bilən bamperlər istehsalı və təmiri asanlaşdırmaq məqsədi daşıyır. Michelin ilə birgə hazırlanmış rəqəmsal şin sistemi isə şinlərin vəziyyətini izləməli və avtomobilin davranışını yol şəraitinə uyğunlaşdırmalıdır.
Salon da funksionallıq və rahatlıq prinsipi əsasında qurulub. Ənənəvi cihazlar panelinin əvəzinə geniş məkan hissi yaradan sadə tərtibat seçilib. Geniş oturacaqlar Citroën Advanced Comfort texnologiyasından istifadə edir, sərnişin oturacağı isə irəli-geri çəkilə bilir.
Çıxarıla bilən saxlama səbətləri, yumşaq qayışlardan hazırlanmış qapı tutacaqları və açıq rəngli materiallar interyerin praktik və səmimi xarakterini tamamlayır.
Sürücünün qarşısında əsas məlumatları birbaşa baxış sahəsinə proyeksiya edən Citroën Smart Vision Display yerləşir. Kvadrat formalı 8 düymlük taçskrin rəqəmsal və fiziki idarəetmə elementlərini birləşdirir.
“Radioën” adlanan çıxarıla bilən radio isə avtomobildən kənarda da portativ dinamik kimi istifadə oluna bilər. Parçadan hazırlanmış qatlanan dam örtüyü salona daha çox işıq daxil olmasına və açıq məkan hissinin yaranmasına kömək edir.
Konseptin bir çox detalı orijinal 2CV-yə işarə edir. Oturacaqlardakı dama naxışı, Bakelit materialını xatırladan rəng çalarları, ön şüşədəki 1948, 1990 və 2026 rəqəmləri avtomobilin tarixini vurğulayır.
Hətta pedallarda da simvolik yanaşma var: tısbağa əyləci, dovşan isə qaz pedalını işarələyir. Qapılardakı saxlama bölmələri isə yumurtaların daşınması üçün nəzərdə tutulub — bu, orijinal 2CV-nin hazırlanması zamanı irəli sürülən tələblərdən birinə istinaddır.
Citroën yeni modelin Avropada istehsal olunmasını və başlanğıc qiymətinin təxminən 15 000 avro olmasını planlaşdırır. Bununla belə, batareyanın tutumu, mühərrikin gücü və yürüş ehtiyatı hələ açıqlanmayıb. Seriya versiyasının 2028-ci ildə, ilk 2CV-nin təqdimatından düz 80 il sonra nümayiş etdirilməsi gözlənilir. Konseptin hansı xüsusiyyətlərinin istehsal modelində qorunacağı isə hələ məlum deyil.
© 2000–2026 Autograph.az. Bütün hüquqlar qorunur. Materialların köçürülməsi və ya hər hansı formada istifadəsi yalnız Autograph.az-a aktiv keçid göstərilməklə mümkündür.
