Geely şirkəti Çində Boyue L adı ilə satılan Atlas krossoverinin benzin versiyasını növbəti dəfə yeniləyib. Model yeni mühərrik, yenilənmiş eksteryerə və daha müasir sürücüyə yardım sistemlərinə sahib olub.
Yenilənmiş krossover yeni bamperlər, xrom çərçivəli radiator barmaqlığı və şaquli dekorativ elementlər ilə fərqlənir. Avtomobilin damında yerləşdirilən lidar isə 27 sensorlu Qianli Haohan 5 elektron köməkçi kompleksinin tərkibinə daxildir.
Əsas yeniliklərdən biri 1,5 litrlik 1.5TD Pro turbomühərrikidir. Bu aqreqat 201 at gücü və 315 Nm fırlanma anı hasil edir. Benzin versiyasının transmissiyası barədə məlumat verilməyib.
Geely Boyue L i-HEV şəbəkədən enerji ilə doldurulmayan hibrid sistemlə təchiz olunur. Bu sistemin tərkibinə 163 at gücünə malik 1,5 litrlik turbomühərrik daxildir. Çin mediası hibrid qurğunun ümumi hasilatının 313 at gücünə çatdığını bildirir. Lakin bu rəqəmin yalnız elektrik mühərrikinə, yoxsa bütün hibrid sisteminə aid olduğu dəqiqləşdirilməyib.
Yenilənmiş benzin versiyasının salonun dizaynı isə böyük ehtimalla hibrid versiyadan götürüləcək. Burada iki ayrı ekran, transmissiyanın “büllur” selektoru və iki səviyyəli mərkəzi tunel nəzərdə tutulub.
Yenilənmiş Geely Boyue L-in Çində satışlarına yaxın vaxtlarda başlanması gözlənilir. Modelin qiyməti hələ açıqlanmayıb.
© 2000–2026 Autograph.az. Bütün hüquqlar qorunur. Materialların köçürülməsi və ya hər hansı formada istifadəsi yalnız Autograph.az-a aktiv keçid göstərilməklə mümkündür.
