Lamborghini Super Veloce, yəni SV adını Revuelto ilə yenidən gündəmə gətirir. 1971-ci ildə Miura SV ilə başlayan və sonradan Diablo, Murciélago və Aventador kimi V12 modellərində davam edən bu ənənə indi markanın hibrid dövrünə keçir. Yeni Revuelto SV 1.050 at gücü ilə Lamborghini-nin bu günə qədərki ən güclü seriya avtomobili olur.
Revuelto-nun əsasını təşkil edən 6,5-litrlik V12 atmosfer mühərriki üç elektrik mühərriki ilə birlikdə işləyir. Sistem ümumilikdə 1.050 at gücü və 1.425 Nm fırlanma anı hasil edir. 0-dan 100 km/saat həddinə təxminən 2,4 saniyəyə, 0-dan 200 km/saat həddinə isə 6,7 saniyəyə çatmaq mümkündür. Maksimal sürət 345 km/saatdan artıqdır, V12 isə 9.500 dövr/dəqiqəyə qədər fırlanır.
Lamborghini gücü artırmaqla kifayətlənməyib. Revuelto SV üçün 7,3 kilovat/saatlıq yeni batareya hazırlanıb. Bu batareya üç elektrik mühərrikinin daha sabit və təkrarlana bilən performans göstərməsinə imkan verir, xüsusilə də trekdə ardıcıl gedişlər zamanı.
Bununla yanaşı, yeni Pilota rejimi sürücüyə beş səviyyəli trəkşn-kontrolu fərdiləşdirmək üçün daha geniş imkanlar verir. Sistemin məntiqi Lamborghini-nin GT3 yarış proqramından götürülüb.
Asqı sistemi də daha çox trek yönümlüdür. Əl ilə tənzimlənən amortizatorlar müxtəlif dövrə növlərinə uyğunlaşdırıla bilir və sürücüyə sazlamaları seçmək imkanı verir. Daha ciddi yenilik isə CCM-R Plus karbon-keramika əyləc diskləridir.
Ön disklərin diametri 420 millimetrə çatır və Lamborghini bildirir ki, avtomobilin 200 km/saat sürətdən tam dayanmasına cəmi 110 metr gərəklidir. Disklərdə 3D karbon strukturu və yarış avtomobillərindən götürülmüş havalandırma həlləri tətbiq edilib.
Revuelto SV-nin görünüşü də onun texniki xarakterinə uyğunlaşdırılıb. Ön hissədə daha kəskin forma və əlavə aerodinamik elementlərdən istifadə olunur, yan hava girişləri isə həm mühərrikin, həm də əyləclərin soyudulmasına xidmət edir. Aerodinamik balans ön tərəfə doğru dəyişdirilib.
Arxada böyük sabit antiqanad və iri diffuzor birlikdə işləyərək standart Revuelto ilə müqayisədə 80% daha çox yerəbasma qüvvəsi yaradır. Bu göstərici son ekstremal Lamborghini modellərindən biri olan Aventador SVJ-dən də 10% yüksəkdir. Əyləclərin soyudulması isə təxminən 12% yaxşılaşdırılıb.
Kuzovda karbondan geniş istifadə edilir. Yeni 3D-Superlight Dromos təkər diskləri ön tərəfdə 20, arxada isə 21 düymlük ölçüdədir. Daha yüngül təkərlər yaylanmayan kütləni azaltmağa və avtomobilin istiqamət dəyişmələrinə reaksiyasını yaxşılaşdırmağa xidmət edir. Xüsusi mərkəzi kilid mexanizmi və yeni Bridgestone şinləri də SV üçün hazırlanıb.
İnteryer də daha çox yarış xarakteri daşıyır. Karbondan qapı panelləri, Pilota rejiminin sükandakı ayrıca düyməsi və xüsusi oturacaqlar avtomobilin əsas məqsədinə işarə edir. Standart idman oturacaqları karbon karkasla təklif edilir, lakin müştəri daha ekstremal monokok karbon yarış oturacaqlarını da seçə bilər.
Revuelto SV-nin eksklüzivliyi isə gücü qədər diqqət çəkir. Lamborghini cəmi 1.963 ədəd istehsal etməyi planlaşdırır. Bu rəqəm təsadüfi deyil: marka 1963-cü ildə yaradılıb və məhdud seriya məhz həmin ilə istinaddır.
Model adi diler satışından daha çox, Lamborghini-nin ən sadiq müştəriləri və kolleksiyaçıları üçün nəzərdə tutulub: qiymətin isə 580 min avrodan xeyli yüksək olacağı gözlənilir.
Beləliklə, Revuelto SV sadəcə daha güclü Revuelto deyil. Lamborghini burada SV adının yarım əsrdən artıq tarixini yeni hibrid V12 dövrünə daşıyır. Miura SV ilə başlayan fəlsəfə — daha çox güc, daha az kompromis və daha sürücü yönümlü xarakter — indi üç elektrik mühərriki, qabaqcıl aerodinamika və yarış texnologiyası ilə birləşir.
Lamborghini üçün Super Veloce heç vaxt sadəcə güc göstəricisi olmayıb. Bu, V12-nin ən ekstremal ifadəsidir. Revuelto SV isə həmin ənənənin yeni dövr üçün yazılmış ən radikal fəsillərindən biridir.
AUTOGRAPH NOTE
SV adı Lamborghini üçün sadəcə üç hərf deyil. O, Miura-dan Aventador-a qədər uzanan V12 irsinin simvoludur. Revuelto SV həmin irsi elektrikləşdirir, amma onun əsas hissəsinə toxunmur: V12 hələ də mərkəzdədir.
Çünki bəzi ənənələr dəyişmək üçün deyil, daha sürətli gələcəyə aparılmaq üçün var.
