Rolls-Royce şirkətinin Bespoke bölməsi Kaliforniyanın Pebbl-Biç rayonunda keçirilmiş özəl tədbirdə ən son layihəsini nümayiş etdirib. Britaniya avtomobil istehsalçısı adı açıqlanmayan müştərilərin sifarişi ilə yaradılmış La Rose Noire Droptail kabrioletini nümayiş etdirib. Rolls-Royce şirkətinin baş direktoru Torsten Müller-Otvos öz hisslərini eksklüziv Rolls-Royce avtomobilində təcəssüm etdirməyə qərar verən, beynəlxalq səviyyədə tanınmış ailədən olan ər və arvad üçün hazırlandığını söyləyib.
Layihənin ilham mənbəyi Fransada seleksiyaçılar tərəfindən yetişdirilmiş Black Baccara qızılgül sortu çıxış edib. Ləçəklərin tünd nar rəngi demək olar ki, qara görünür, lakin birbaşa işıqda tünd səthdə qırmızı, mirvari parıltı görünür. Bu iki çalar avtomobildə təcəssüm olunub: qırmızı True Love layihənin romantik əslini vurğulayır, tünd Mystery isə, müxtəlif rakurslardan baxdıqda rəngini dəyişirmiş kimi görünən qızılgülün sirli təbiətindən ilhamlanıb.
Oxşar effektə nail olmaq üçün Rolls-Royce mütəxəssisləri 150-dən çox dəqiq iterasiyadan sonra təkmilləşdirilmiş yeni boyama prosesini hazırlayıblar. Çox gizli saxlanılan əsas örtükdən sonra, hər biri bir az fərqli qırmızı çalar ilə qarışdırılmış beş şəffaf lak qatı gəlir. Xromlama prosesində öz rəngini əldə edən tünd Hydroshade kuzov dekorasiyası paslanmayan polad altlığa cəmi bir mikron ölçüsündə nazik təbəqə ilə vurulur.
Bu örtükdən hər biri güzgü effektinə qədər əl ilə cilalanmış interyerdəki bəzi metal hissələrdə də istifadə olunur. Qatlanan dam şəffaflığını dəyişdirən elektroxrom şüşə bölməni, həmçinin modelin adı olan xüsusi dekorativ elementi alıb. Salon tərtibatı üçün 1603 ədəd qara şpon üçbucaqdan istifadə edilib. Naxış 1070 simmetrik fon elementindən və qızılgül ləçəklərini təmsil edən 533 asimmetrik qırmızı elementdən ibarətdir.
Hər üçbucaq qara çinar ağacından oyulmuş, əllə cilalanmış və quraşdırılmışdır. Oturacaqların üzlənməsi üçün tünd qırmızı Mystery və açıq qırmızı True Love dərisindən istifadə olunur ki, onların da hər biri Black Baccara qızılgül ləçəklərinin sədəf fakturasını xatırladan incə mis aksentlərlə bəzədilir. Ön panel eksklüziv Audemars Piguet Royal Oak Concept Split-Seconds Chronograph GMT Large Date saatı ilə bəzədilib. Müştərilər avtomobilin qəbulu mərasimini eksklüziv Champagne de Lossy şampan şərabı ilə qeyd etmək qərarına gəliblər. Rolls-Royce şirkəti bu şərab üçün xüsusi qutu da hazırlayıb.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
