Skoda şirkətinin arsenalındakı Karoq, Kodiaq və Kamiq modellərinə adı K hərfi ilə başlayan və Q hərfi ilə bitən yeni krossover qoşulub. Dördüncü model Kushaq adlanır: sanskrit dilində (Hindistanın qədim ədəbi dili) kral və ya imperatoru belə adlandırırlar. Belə yanaşmanın təvazökarlıqdan bir qədər uzaq olduğunu fikirləşə bilərsiniz, lakin Skoda Hindistan bazarında premium marka kimi təqdim olunur.
Kushaq krossoveri Skoda şirkətinin India 2.0 strategiyası çərçivəsində yaratdığı ilk modeldir. Ancaq əslində kral adının altında Hindistanın tələblərinə uyğunlaşdırılmış və yenidən işlənmiş, avropalılara yaxşı tanış olan 2019-cu model ilinin Skoda Kamiq krossoveri gizlənir.
Avtomobilin kuzovu ciddi şəkildə yenidən qurulmuş və iş yalnız yenidən dizayn edilmiş ön tərəfdə deyil. Məsələn, arxa dayaqdakı pəncərələrin əvəzinə yalnız kiçik tıxaclar var. Şirkət krossoverini güzəştli dörd metrlik uzunluğuna uyğunlaşdırmayıb: bu, kral işi deyil. Buna görə Kushaq və Kamiq eyni təkər bazasına (2651 millimetr) malikdirlər və ölçülərinə görə yaxındırlar: hindistanlı avtomobilin uzunluğu 4221 millimetr, eni 1760 millimetrdir. Lakin Kushaq nəzərəçarpacaq dərəcədə yüksəkdir: 1531 millimetrə qarşı 1612 millimetr.
Krossoverin əsasını MQB-A0-IN platforması təşkil edir. Bu isə, qlobal platformanın Skoda tərəfindən Hindistan üçün xüsusi olaraq uyğunlaşdırılan sadələşdirilmiş və ucuz versiyasıdır. Yeni krossoverin pasport üzrə klirensi 188 millimetr, baqaj bölümünün həcmisə 385 ilə 1405 litr arasındadır.
İnteryer ümumi arxitekturanı qoruyub saxlasa da, ön panelin tamamilə fərqlidir. Burada havalandırma sisteminin iri deflektorları, klimat-kontrolun sensorlu bloku, mediasistemin 10-düymlük ekranı var. Bahalı versiyalarda ətraf işıqlandırması və hətta ön oturacaqların ventilyasiyası təklif edilir. “Kuşaq” altıya qədər hava yastığı ilə təchiz edilə bilər.
Kushaq modelinin mühərrik çeşidi Hindistan üçün uyğunlaşdırılmışdır və aqreqatların arasında dizel mühərriki yer almayıb. Əsas mühərrik, mexaniki transmissiya və ya klassik altı pilləli “avtomat” ilə tandemdə çalışan 115 at qüvvəli 1.0 TSI benzin turbomühərrikdir. Bahalı versiyalar mexaniki transmissiya və ya yeddi pilləli DSG "robot" ilə birlikdə çalışan 150 at qüvvəli 1,5 TSI turbomühərriklə təchiz edilirlər. Ötürmə - yalnız ön oxadır.
Skoda Kushaq krossoverləri Punedəki zavodda istehsal ediləcəkdir. Ən maraqlısı isə, elan edilmiş lokalizasiya dərəcəsi 95 faizdir! Hətta, 1,0-litrlik turbomühərriklər də Hindistanda buraxılacaqdırlar.
