Məhz Yaponiya və Amerikada yeni Toyota Crown öz doğma brendini saxlayıb. Bu yaxınlarda Çində korporativ iyerarxiyada Toyota və Lexus markaları arasında yerləşən ayrıca Crown brendi təqdim edilib. Yeni brendin ilk modeli Crown SportCross kross-sedanı olub: onun təqdimatı yerli Quançjou avtosalonunda baş tutub və kross-sedanın qiymətləri də burada açıqlanıb (53 min dollardan başlayır). Eyni zamanda, yaponlar ilk dəfə gələcək dördqapılı Crown Sedan modelini də canlı nümayiş etdiriblər.
Bu, Crown sülaləsinin əsl varisi, ailə DNT-sinin daşıyıcısı və ənənələrin davamçısıdır. Axı, Crown SportCross modeli eninə yerləşən mühərrikə və əsas ön ötürməyə malikdirsə, Crown Sedan klassik quruluşa (uzununa yerləşən mühərrik və arxa ötürmə) və arxaya çəkilmiş salonu olan GA-L platformasına əsaslanır. Crown ailəsinin on altıncı nəslində yalnız sedan klassik quruluşa sahib olacaqdır: yayda işıq üzü görəcək universal və krossover kross-sedanla “eninə” platformanı paylaşacaqdır.
Quançjouda keçirilən sərgidə Toyota sedanı ilk dəfə canlı nümayiş etdirib, lakin bu real avtomobil deyil, yalnız təkərlər üzərindəki tamölçülü maketdir. Onun salonu və hətta asqısı yoxdur, alt hissəsi isə hamardır. Lakin avtomobilin görünüşü artıq yekunlaşıb. Kuzovun forması və nisbətlərindən göründüyü kimi, yeni Crown Sedan GA-L platformasında inşa edilən Toyota Mirai hidrogen modeli ilə geniş şəkildə unifikasiya olunacaqdır.
Toyota hələlik güc aqreqatı haqqında məlumat yaymayıb, lakin Crown Sedan modelinin hibrid olacağını təxmin etmək çətin deyil. Dördsilindrli benzin mühərrikləri olan versiyalar da mütləq təklif ediləcəkdir, lakin V6 mühərrikləri sual altındadır. Əlbəttə ki, belə bir Crown kross-sedandan nəzərəçarpacaq dərəcədə baha olacaqdır. Seriya sedanının debütünün bu il keçirilməsi planlaşdırılıb.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
