Toyota şirkətinin yeni nəsil Tundra pikapını təqdim etməyə hazırlaşdığı artıq hər kəsə məlumdur. Bu, 2007-ci ildən bəri baş verəcək ilk nəsil dəyişikliyidir. Yapon istehsalçısı yeni pikapın eksteryer dizaynını qismən açıqlayan tizerləri dərc etsə də, casuslar avtomobilin şəkillərini İnternet şəbəkəsinə sızdırmağa müvəffəq olublar. Artıq Toyota şirkəti də yeni pikapın rəsmi şəklini dərc etmək məcburiyyətində qalıb.
Şəkilləri sızdırılan Tundra pikapı TRD Pro təchizatındadır. Beləliklə, 2022-ci model ilinin Tundra pikapı yeni tünd rəngli radiator barmaqlığına, əlavə diod işıqlandırması və T-şəkilli gündüz hərəkət işıqları olan LED fənərlərə, habelə ön və arxa tərəfdəki narıncı rəngli qabarit işıqlarına sahib olacaqdır.
Bu günlərdə Toyota yeni pikapın texniki xarakteristikalarını açıqlayıb. Dərc edilmiş tizerdə mühərrikin qapağının üzərində iForce Max loqotipi görünür ki, bu da mühərrik bölümündə altısilindrli aqreqatıb quraşdırıldığından xəbər verir.
Çox güman ki, pikapın kapotunun altında yenicə təqdim olunmuş Land Cruiser 300 modelindən tanış olan 415 at qüvvəsi və 650 Nm fırlanma anı hasil edən 3,5-litrlik V6 benzin mühərriki yerləşdiriləcəkdir. Güc qurğusu 10-pilləli “avtomat” ilə tandemdə çalışacaqdır.
Yeni nəsil Toyota Tundra pikapının təqdimatının payızda keçiriləcəyi gözlənilir.
