Xatırlayırsınızsa, 2018-ci ildə Land Rover şirkəti Cenevrə avtosalonunda Range Rover SV Coupe modelini nümayiş etdirmişdi. İstehsalçı qiyməti 240.000 funt sterlinq olan xüsusi ofrouderin 999 nüsxədən ibarət olan tirajla buraxılacağını bildirsə də, sonradan qarşılaşdığı rekord zərər və Çində dəbdəbəli avtomobillərə olan tələbatın azalması səbəbindən onu buraxmaqdan imtina etmişdi.
Müdrik atalarımız yaxşı deyiblər - «yeməyənin payını yeyərlər». Bu günlərdə Londonda fəaliyyət göstərən Niels van Roij Design studiyası Range Rover modelinin əsasında hazırladığı Adventum Coupe adlı ofrouderin ilk nüsxəsini təqdim edib. Yəqin ki, modelin üçqapılı kuzova malik olduğunu anladınız. Adventum Coupe modeli 100 nüsxəlik tirajla buraxılacaq, orijinal kuzovu və yaxtaların tərtibatı üçün istifadə olunan tik ağacdan hazırlanmış döşəməsi ilə fərqlənəcəkdir.
Üçqapılı Adventum Coupe adi Range Rover modelindən təkcə arxa qapıların yoxluğu ilə fərqlənmir: ofrouderin kuzovunun ön dayağından başlamış arxa dayağına qədər olan hissəsi əllə alüminium təbəqələrdən hazırlanmışdır - yalnız kapot, qanadlar və baqaj qapağı dəyişilməz qalıb.
İnteryerin dizaynında müştərinin istəkləri nəzərə alınıb: salon tərtibatında əsl dəri, tvid, tik ağacı və qoyun yunundan istifadə edilmişdir. Əlbəttə ki, studiya müştəriləri bununla məhdudlaşdırmaq fikrində deyil: onlar tikişlərin naxışlarını və rənglərini, basmanaxışları, tikmələri və daha çoxunu seçmək hüququna malikdirlər.
Qırmızı rəngli nappa dəri ilə üzlənmiş salona malik olan ilk Adventum Coupe modelinin kuzovu ağ Artic White rənginə boyanıbdır. Avtomobilin döşəməsi tamamilə tik tamasalardan ibarətdir ki, onların arasındakı bəxyələr isə kuzovun rəngini təkrarlayır. Döşəmənin əsasını Afrikada bitən nəmə davamlı okume ağacından hazırlanmış lövhə təşkil edir. Avtomobilin baqajında dəri tutacaqları olan iki çətir yerləşdirilib.
Adventum Coupe modelinin kapotunun altında 525 at qüvvəsi və 625 Nm fırlanma anı hasil edən kompressorlu 5,0-litrlik V8 mühərriki quraşdırılıb. Avtomobilin ilkin qiyməti 270.000 avrodan başlayır. Üçqapılı Range Rover modelinin yaradılması orta hesabla altı ay vaxt tələb edir.
