Volkswagen şirkəti yenilənmiş Arteon modelinin ikinci və sonuncu tizerini dərc edib. Yenilənmiş Arteon modelinin və onun Shooting Brake kuzovlu versiyasının təqdimatı sabah keçiriləcəkdir.
Videoçarxda liftbek kuzovlu versiya təsvir olunub. Alman istehsalçısı Arteon Shooting Brake modelini hələlik gizlətməyə üstünlük verir, amma Çinin sertifikasiya orqanları sayəsində hər iki modelin eksteryer dizaynını əks etdirən şəkillər ilə tanış olmağa imkan tapmışıq.
Yenilənmiş Arteon modelinin xarici görkəmində elə də ciddi dəyişikliklər gözlənilmir. Modeldə baş vermiş əsas dəyişikliyin yeni LED işıq texnikası olacağı ehtimal olunur. Ön fənərlər Golf modelində olduğu kimi, radiator barmaqlığı boyu uzanan zolaqla birləşdiriləcəkdirlər.
Modelin interyerində yeni MIB3 multimedia sistemi quraşdırılacaqdır. Bundan başqa, Arteon 210 km/saat həddinə qədər çalışan yarımavtonom idarəetmə sisteminə sahib olacaqdır.
Eyni zamanda, Arteon modelinin "bərkgedən" R indeksli modifikasiyasının təqdim ediləcəyi də gözlənilir. Yeganə naməlum olan Arteon Shooting Brake modelinin də belə versiyaya sahib olub-olmayacağıdır. Arteon R modelinin hansı mühərriklə təchiz ediləcəyi də hələlik sirrdir: namizədlər arasında Golf R modelindən tanış olan 333 at qüvvəli 2,0-litrlik turbomühərrik də vardır. Bundan başqa, yenə də Golf GTE modelindən tanış olan hibrid güc qurğusu ilə təchiz edilmiş Arteon GTE modelinin də təklif ediləcəyini gözləmək olar.
Yenilənmiş Arteon modelinin təqdimatı sabah Bakı vaxtı ilə 12:00-da keçiriləcəkdir. Təqdimat onlayn rejimində nümayiş etdiriləcəkdir.
