Yığcam T-Roc krossoveri Volkswagen şirkətinin model çeşidinə 2017-ci ildə qoşulub və tez bir zamanda Avropadakı bestsellerlərin birinə çevrilib. Məsələn, keçən il T-Roc Avropada (203 min avtomobil) ən çox satılan avtomobillərin ilk beşliyinə daxil olub və digər bazarlarla (ilk növbədə Çin) birlikdə onun satış həcmi 292 min ədəd təşkil edib. Səkkiz illik istehsal ərzində T-Roc krossoverinin tirajı iki milyonu keçib. İndi isə, Almaniyada Volkswagen T-Roc modelinin ikinci nəsil təqdim olunub.
Modelin formatı dəyişməz qalıb: əslində o, özünəməxsus kuzovu və fərqli dizaynı olan “hündürləşdirilmiş” Golf modeli olsa da, iki modeli vizual olaraq səhv salmaq mümkün deyil. Yeni krossoverin dizaynı brendin ən son modelləri - böyük Tiguan və Tayron krossoverlərinin üslubunda hazırlanıb. T-Roc həmçinin aralarında LED bənd olan nazik ön faraları, arxa tərəfdə isə, dəbli monofənəri alıb. Zəngin versiyalardakı ön və arxa tərəfdəki brend loqotipləri işıqlandırılırlar. Yan tərəflər üslubun davamlılığını qoruyub saxlayıblar: arxa dirəkdəki "üzgəc" və təbii tutuşlu rahat qapı dəstəkləri yerindədirlər. Altı kuzov rəngi və qara damı olan iki rəngli boyama da təklif edilir. Təkər disklərinin maksimal diametri 20 düymdür.
Nəsil dəyişikliyi ilə Volkswagen T-Roc nəzərəçarpacaq dərəcədə böyüyüb: onun uzunluğu 4373 millimetr (+ 122 millimetr), eni - 1828 millimetr (+ 9 millimetr), hündürlüyü isə, 1562 millimetr (+ 9 millimetr) təşkil edir. Təkər bazası 41 millimetr artaraq 2631 millimetr ə çatıb. Bir sözlə, yeni nəsil T-Roc krossoverinin təkər bazası birinci nəsil Tiguan modelində olduğundan daha uzundur. Nəticədə, arxa sərnişinlərə daha geniş məkan təklif olunur: boyu 1,85 metr olan insanlar bir-birinin arxasında sərbəst otura bilərlər. Baqajın həcmi 20 litr artaraq 465 litrə çatıb. Cd (0,29) aerodinamik müqavimət əmsalında 10% azalma var. Eyni vaxtda, R-Line paketi (şəkillərdəki sarı avtomobil) ilə təchiz edilmiş versiya da təqdim olunub: o, daha aqressiv dizaynı və genişləndirilmiş qara dekoru ilə seçilir.
Krossoverin interyer tərtibatı Volkswagen brendinin ənənəvi həllərindən daha bir addım daha uzaqlaşıb: cihazlar panelinin 10-düymlük displeyi indi günəşliksiz ayrıca korpusda quraşdırılıb. Ön panelin yuxarı hissəsi sintetik parça ilə üzlənib və gümüşü haşiyə ilə bəzədilib. MIB4 media sisteminin planşetinin diaqonalı 10,4 və ya 12,9 düym (təchizatdan asılı olaraq) ola bilər. Multimedia sistemi quraşdırılmış ChatGPT süni intellektinə və qabaqcıl səs köməkçisinə malikdir. Əlavə ödəniş müqabilində ön şüşəyə proyeksiya da təklif olunur.
Transmissiya selektoru sükan sütununa keçib (mexaniki transmissiyalı versiya olmayacaq), sükan çarxında isə, fiziki düymələr yerləşir. Mərkəzi tuneldə USB-C konnektorları və simsiz enerji doldurma paneli var. Seçimlər siyahısına genişləndirilmiş kontur işıqlandırması və premium Harman/Kardon audio sistemi daxildir. Adaptiv kruiz-kontrol bir sıra yeni funksiyaları əldə edib, smartfonla idarə olunan Park Assist Pro avtoparkinq sistemi də mövcuddur.
İkinci nəsil Volkswagen T-Roc krossoveri markanın pərəstişkarlarına yaxşı tanış olan MQB Evo platformasına əsaslanır. Bütün mühərriklər 48 voltluq hibrid əlavə ilə tamamlanır (elektrik mühərriki 19 at qüvvəsi və 56 Nm hasil edir), yeganə ötürmələr qutusu isə, yeddi pilləli preselektiv DSG “robot”dur. EA211 seriyasından olan başlanğıc 1,5 eTSI turbomühərriki 116 at qüvvəsi və 220 Nm, onun qabaqcıl versiyası isə, 150 at qüvvəsi və 250 Nm hasil edir. Hər iki variant yalnız ön ötürməlidir. 4Motion tam ötürmə sistemi daha sonra, özü də 2,0-litrlik turbomühərriklə birlikdə təklif olunacaq. “Qaynar” T-Roc R modifikasiyası və plug-in hibridlərin buraxılacağı da bəyan edilib. İkiqapılı T-Roc Cabriolet modelinin taleyi sual altındadır. Qeyd etmək gərəkdir ki, T-Roc kabrioleti çeşiddəki ən cəlbedici avtomobillərdən biri idi.
Volkswagen T-Roc krossoverlərinin istehsalı Lissabon yaxınlığında yerləşən Palmeladakı Autoeuropa zavodunda davam etdiriləcək. İlk əmtəə avtomobillərinin göndərilməsi noyabr ayına planlaşdırılır. Yeni krossoverə sifarişlər artıq qəbul olunurlar. Almaniyada ikinci nəsil T-Roc modelinin satış qiyməti 30 845 avrodan başlayır. Yəni o, sələfindən demək olar ki, 800 avro bahadır.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
