2024-cü ilin əvvəlində Volkswagen əfsanəvi Golf modelinin yenilənmiş versiyasını təqdim edib. Yenilənmiş hetçbek və universal yeni avadanlıq sayəsində "daha ağıllı" olub və daha güclü mühərrikləri alıb. Lakin bayraqdar Golf R modelinin həvəskarları onun yenilənmiş versiyasını bir qədər gözləməli olacaqlar. Odur ki, alman istehsalçısı hələlik “bərkgedən” hetçbekin yalnız kamuflyaja bürünmüş versiyasını nümayiş etdirib.
![](https://autograph.az/../images/139794_src.jpg)
Ən güclü hetçbekin debütü Avstriyanın Zell am See gölündə keçirilən ənənəvi Ice Race yarışında baş tutub - əfsanəvi yarışçı Hans-Yoahim Ştuk və ralli-kross üzrə altıqat dünya çempionu Yohan Kristoffersson yeni Golf GTI, Golf eHybrid və Golf GTE modellərini buz üzərində sınaqdan keçiriblər. İdmançılar həmçinin hazırda seriya prototipi qismində təqdim olunan yeni Golf R hetçbekini də sınayıblar.
![](https://autograph.az/../images/139795_src.jpg)
Tamötürməli hetçbek geniş ictimaiyyətə kamuflyajlı livreyada və R versiyasına xas olan mavi rəngdə təqdim edilib. Baza Golf və Golf GTI modellərinin aldığı yeniləmələrə əlavə olaraq, yeni Golf R inkişaf etdirilmiş aerodinamik kuzov dəstini, yeni diskləri və mavi aksentləri əldə edəcək. Yeni “bərkgedən” hetçbekin texniki xüsusiyyətləri açıqlanmayıb, lakin avtomobilin daha güclü olacağı aydındır.
![](https://autograph.az/../images/139796_src.jpg)
Soldan sağa: Yohan Kristoffersson, Hans-Yoahim Ştuk və Raynhold İvents
Golf GTI modelindəki 2,0-litrlik benzin mühərriki 20 at qüvvəsi daha güclü olub və indi 265 at qüvvəsi hasil edir. Odur ki, yeniləmədən əvvəl 315 at qüvvəli mühərrik və 7-pilləli DSG “robotu” ilə təchiz edilən Golf R daha güclü olmalıdır. Volkswagen R bölməsinin rəhbəri Raynhold İvents yenilənmiş Volkswagen Golf R modelinin rəsmi təqdimatının 2024-cü ilin yayında keçiriləcəyini bildirib.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.