Müəllif Wheelsandmore tüninq atelyesi unikal layihələrlə avtomobil aləmini təəccübləndirməyə davam edir. Bu dəfə atelye mütəxəssisləri "qaynar" Audi RS6 və RS7, həmçinin R8 Spyder sportkarı modelləri üzərində işləmişdirlər.
Bildiyimiz kimi, bu avtomobillərin 4,0-litrlik səkkiz silindrli mühərriki 560 at qüvvəsinə və 700 Nm fırlanma anına malikdir. Atelye mütəxəssislərinin müdaxiləsindən sonra, güc aqreqatı 820 at qüvvəsinə və 980 Nm fırlanma anı hasil edir. Atelyedən verilən məlumata əsasən, aqreqatın güc xarakteristikalarının artırılmasına yeni turbokompressorların quraşdırılması, idarəetmə blokunun optimallaşdırılması və tənzimlənən klapanı olan buraxılış sisteminin tətbiqi sayəsində nail olunmuşdur.
Avtomobillərin dinamik xüsusiyyətləri açıqlanmasa da, onların maksimal sürətlərinin 344 km/saat təşkil etdiyi məlumdur.
Eyni zamanda, tüninq keçmiş avtomobillər 22-düymlük unikal təkər disklərinə və 305/25 ölçülü Continental şinlərinə sahib olmuşdurlar. Əlavə olaraq, avtomobillərdə KW firmasının tənzimlənən asqısı və sürücüyə onların klirensi dəyişməyə imkan verən LowMaXX elektron modulu quraşdırılmışdır.
Təkmilləşdirilmələrdən nəsibini almış modellərdən biri də Audi R8 Spyder rodsteri olmuşdur. Tüninq keçmiş rodsterin 5,2-litrlik V10 mühərrikinin gücü 800 at qüvvəsinə, fırlanma anı isə 810 Nm-ə yüksəldilmişdir. Yeni güc xarakteristikaları rodsterə 100 km/saat həddinə 2,9 saniyəyə sürətlənməyə imkan verir. 200 km/saat həddinə çatmağa isə 8,5 saniyə tələb edilir.
Bununla yanaşı, rodster öndə 20, arxada isə 21-düymlük təkər disklərinə, həmçinin müvafiq olaraq 24530 və 325/25 ölçülü şinlərə sahib olmuşdur.
Rosdter də RS6 və RS7 modellərində olduğu kimi tənzimlənən asqı sistemini əldə etmişdir.
