İstehsalı 2022-ci ilin yazında başlanacaq gələcək Alfa Romeo Tonale krossoverinin Dodge markası altında buraxılan “qohumu” olacaqdır.
Passione Auto Italiane portalının bildirdiyinə görə, Tonale modelinin yığılacağı Fiat şirkətinin Pomiliano d'Arkodakı zavodunu (hazırda bu zavodda yalnız Fiat Panda hetçbekəri istehsal olunur), başqa bir modelin – yığcam Dodge Hornet krossoverinin istehsalı üçün hazırlayırlar.
Təəssüf ki, bu barədə ətraflı məlumat verilməyib. Alfa Romeo Tonale kimi, gələcək Dodge Hornet krossoveri də, Jeep Compass modelinin eninə yerləşən mühərriki olan platformasına əsaslanır. Bu, amerikan krossoverinin arxa oxda muftası olan tam ötürmə sisteminə sahib olacağından xəbər verir.
Hornet modelinin əsasən Amerika bazarı üçün nəzərdə tutulduğu məlumdur (Dodge markası hazırda Avropada təmsil olunmur). Krossoverin kapotunun altında 2,0-litrlik benzin turbomühərriki quraşdırılacaqdır.
Dodge Hornet adı 2006-cı ildə Cenevrə avtosalonunda nümayiş etdirilmiş konsept avtomobili üçün istifadə olunmuşdu. Lakin o zaman amerikan markası bu layihəni inkişaf etdirməmək qərarına gəlmişdi. Odur ki, gələcək Hornet modeli uzun müddətli fasilədən sonra Dodge markasının həqiqətən ilk yeni model olacaqdır.
Hazırda amerikan istehsalçısının model cərgəsində üç heç də gənc olmayan model mövcuddur: Charger sedanı, Challenger kupesi və Durango krossoveri. Meksikada isə, Dodge markası altında ucuz Attitude (Mitsubishi Attrage) və Neon (Fiat Tipo) sedanları satılır.
