Toyota artıq bir neçə ildir ki, yeni flaqman superkar üzərində işləyir, lakin onun ətrafındakı media aktivliyi olduqca qəribə xarakter daşıyır. Məsələn, şirkət iyul ayında Böyük Britaniyada keçirilən Qudvud Sürət Festivalına adı məlum olmayan iki prototip gətirsə də, onlar barədə heç bir rəsmi açıqlama verməyib. İndi isə, Kaliforniyada keçirilən Pebble Beach Concours d'Elegance müsabiqəsində başqa bir prototip nümayiş etdirilib və yenə də məlumat dəstəyi yoxdur. Lakin bu dəfə Toyota avtomobilin rəsmi görüntülərini təqdim edib.
Lexus Sport Concept - yeni nəsil superkarın carçısıdır. Verilmiş rəsmi məlumat bununla bitir. Lexus superkarı öz dizaynına malik olsa da, prototipin uzun kapotu və geriyə sürüşdürülmüş salonu olan ümumi nisbətlərinə baxdıqda onun Toyota GT layihəsi ilə geniş şəkildə unifikasiya olunduğu aydın görünür. İlkin məlumata görə, şirkət həqiqətən də superkarın iki versiyasını hazırlayır: Toyota brendi altında kupe Asiya və Avropa, müvafiq Lexus kupesi isə, Amerika üçün nəzərdə tutulub. Lakin bu hələlik təsdiqini tapmayıb.
Lexus Sport Concept prototipi buraxılış sisteminin çıxış borularının olmaması ilə çaşdıra bilər, amma əslində onlar var! İki çıxış borusu spoylerin altında gizlədilib. Parkinq rejimində bu spoyler kuzova sıxılır və etibarlı şəkildə "iki lüləlini" maskalayır, lakin avtomobil hərəkət edərkən buraxılışa heç nə mane törətmir. Superkarın V8 aqreqatı və elektrik mühərriki ilə hərəkətə gəldiyi güman edilir və hibrid sistemin ümumi gücünün təxminən 900 at qüvvəsinə bərabər olacağı ehtimal olunur.
İlkin məlumata görə, Toyota 2026-cı ildə şərti adları Toyota GT və Lexus LFR olan superkarları rəsmən təqdim etməlidir. Bu müddət ərzində yeniliklər haqqında yeni təfərrüatlar ortaya çıxa bilər.
© Bütün hüquqlar Autograph.az saytına məxsusdur. Xəbərdən istifadə zamanı sayta istinad etmək mütləqdir.
