BMW şirkəti sabah yenilənmiş 7-Series bayraqdar sedanını təqdim edəcəkdir. Bu münasibətlə alman istehsalçısı yenilənmiş sedanın tizerini dərc edib. Əslində yenilənmiş BMW 7-Series modelinin dizaynı heç kim üçün sirr deyil..
Yenilənmiş bayraqdar sedan iri radiator barmaqlığı, ön fənərlərin, kapotun, işıqlanan zolaqla birləşmiş arxa fənərlərin, bamperin və buraxılış sisteminin çıxış borularının forması, həmçinin “hokkey çubuğu” adını almış xüsusi dekorativ elementi ilə seçilir.
BMWBlog nəşrinin bildirdiyinə görə, yenilənmiş bayraqdar sedanın mühərrik çeşidində də dəyişikliklər olacaqdır. Sıralı altı silindrli mühərrik 340, 374 (450 Nm) və 388 (500 Nm) at qüvvəsinə malik olacaqdır. 3,0-litrlik mühərrikin əsasında yaradılmış hibrid aqreqat 394 at qüvvəsi və 600 Nm fırlanma anı hasil edəcəkdir.
BMW 750i modeli 530 at qüvvəsi və 750 Nm fırlanma anı hasil edən 4,4-litrlik biturbo V8 mühərriki ilə təchiz ediləcəkdir. BMW M760i xDrive versiyası sərt hissəciklər filtri ilə təchiz edilərək yenidən satışa çıxarılacaqdır. V12 biturbo mühərrikinin hasilatı 600 at qüvvəsi olacaqdır.
