Almaniyanın ZF şirkəti elektrik avtomobilləri üçün 30 000 dövr/dəqiqəyədək fırlanan yeni nəsil mühərrik hazırlayıb. High Revolution Drive adlanan sistem eyni gücü daha kiçik və yüngül aqreqatla təmin etməyi, həmçinin bahalı maqnit materiallarına tələbatı azaltmağı vəd edir.
ZF-in məlumatına görə, yeni qurğu şirkətin 18 000 dövr/dəqiqəyədək fırlanan Select sistemləri ilə müqayisədə təxminən 25 faiz yüngül və daha yığcamdır. Bundan başqa, mühərrikdə istifadə olunan maqnit materiallarının miqdarı yarıya endirilib. Səmərəlilik isə təxminən 93 faiz səviyyəsində saxlanılıb.
Yeni sistem elektrik mühərrikini, güc elektronikasını və transmissiyanı vahid korpusda birləşdirir. Mühərrikin yüksək fırlanma sürəti onun daha kiçik ölçülərlə tələb olunan gücü hasil etməsinə imkan verir. Transmissiya isə dövrlərin sayını azaldaraq təkərlərə ötürülən fırlanma anını artırır.
Təqdim edilmiş versiya 268 at gücü hasil edir. Təxminən 18:1 ötürmə nisbətinə malik transmissiya vasitəsilə təkərlərə 3500 Nm-dək fırlanma anı ötürülür. ZF bildirir ki, seriya istehsalı üçün nəzərdə tutulan sistem 200–268 at gücü diapazonunda təklif ediləcək və həm 400, həm də 800 voltluq elektrik arxitekturaları ilə uyğun olacaq.
Modul Select platformasından istifadə yeni aqreqatın avtomobillərə inteqrasiyasını asanlaşdırmalı, işlənib hazırlanma müddətini və xərcləri azaltmalıdır. ZF artıq avtomobil istehsalçıları ilə danışıqlar aparır. Seriya istehsalına isə 2030-cu ildə başlanması planlaşdırılır.
Şirkət bununla yanaşı, elektrik ötürücü sistemlərinin təmirini asanlaşdırmaq üçün dəstlər təqdim edib. Bu dəstlər servis mərkəzlərinə bütöv aqreqatı dəyişmək əvəzinə, sürətlər qutusunun podşipnikləri kimi ayrı-ayrı komponentləri təmir etməyə imkan verir.
ZF-in yeni mühərrikinin hansı avtomobildə debüt edəcəyi hələlik açıqlanmayıb. Bununla belə, layihənin əsas məqsədi rekord güc göstəriciləri əldə etməkdən daha çox, elektrik avtomobillərinin ötürücü sistemlərini yüngülləşdirmək, yığcamlaşdırmaq və istehsal xərclərini azaltmaqdır.
© 2000–2026 Autograph.az. Bütün hüquqlar qorunur. Materialların köçürülməsi və ya hər hansı formada istifadəsi yalnız Autograph.az-a aktiv keçid göstərilməklə mümkündür.
