Instagram şəbəkəsində yeni nəsil Mitsubishi Outlander şəkilləri dərc edilib. Kamuflyaj örtüyü olmayan krossoverə parkinqlərin birində rast gəlinib ki, bu da yeni modeli hərtərəfli nəzərdən keçirməyə imkan verib.
Yeni şəkillər Outlander modelinin növbəti nəslinin 2019-cu ildə nümayiş etdirilmiş Engelberg Tourer konseptinin üslubunda dizayna malik olub: hər iki avtomobil bənzər ön və arxa işıq texnikasına, habelə radiator barmaqlığına sahibdirlər. Fərqlər də var - şou avtomobilindəki bamperi haşiyələndirən qövs şəklində olan işıqqaytaranlar, seriya modelində üfüqi zolaqlara çevriliblər.
Növbəti nəsil Mitsubishi Outlander modeli Nissan X-Trail krossoverinin əsasını təşkil edən CMF-C/D platformasında inşa ediləcəkdir. Yeni modelin mühərrik çeşidinə 184 at qüvvəsi və 245 Nm fırlanma anı hasil edən 2.5-litrlik benzin mühərriki daxil olacaqdır. Güc qurğusu variator ilə tandemdə çalışacaqdır. Bundan başqa, hibrid modifikasiyanın da təklif ediləcəyi istisna edilmir - hibridin əsas bazarı Avropa olacaqdır.
Yeni Outlander modelinin təqdimatı 2021-ci ilin əvvəlində baş tuta bilər. Yeni krossoverin satışlarına gələn ilin üçüncü rübündə başlamalıdır.
